У нядзелю 11 лютага католікі беларускага паходжання Масквы і Маскоўскай вобласці сабраліся на святую Імшу ў капліцы кляштара айцоў францішканаў у Маскве.
Эўхарыстыю цэлебраваў душпастыр беларусаў-католікаў сталічнага рэгіёна суседняй краіны айцец Пётр Карнелюк OFMConv.
У прамоўленай гаміліі святар засяродзіўся на Евангеллі шостай звычайнай нядзелі і заклікаў суайчыннікаў падысці да Вялікага посту, памятаючы пра духоўнае ачышчэнне.
«Падобна таму, як быў ачышчаны хворы на праказу, таксама і нам належыць ачысціцца духоўна ад каросты граху», — падкрэсліў айцец Пётр.
Чалавек прыходзіць да Хрыста, падае перад Ім ніцма і просіць: «Калі хочаш, можаш мяне ачысціць». Нягледзячы на тое, што па законах таго часу было забаронена рабіць такое пракажоным, у ім нарадзілася вера ў Езуса.
«Для Хрыста кожны з нас годны. Езус не адварочваецца ад пракажонага, а наадварот, працягвае яму руку, ачышчае і вяртае чалавека ў грамадства. Датыкаецца, аздараўляе, паказваючы моц збаўлення, моц самога Бога. Для Яго кожны годны быць разам з Богам, разам з Касцёлам. Кожны з нас аднолькава каштоўны для Хрыста, незалежна ад таго, да якога кола людзей мы належым, якога паходжання ці статусу ў грамадстве. Менавіта таму Хрыстус вяртае здароўе хвораму на праказу. Таксама і да кожнага з нас Ён ставіцца з павагай і жадае, каб мы прынялі Ягоную праўду, каб данеслі святло духоўнага ачышчэння іншым, як аздароўлены ў Галілеі расказваў мясцовым жыхарам пра цуд ачышчэння ад праказы», — адзначыў святар.
Пасля заканчэння святой Імшы адбылася сустрэча ўдзельнікаў набажэнства з айцом Пятром у францішканскім цэнтры пры кляштары.
Вернікі-беларусы шчыра павіншавалі свайго душпастыра з днём нараджэння, сказалі шмат цёплых словаў і праспявалі прыгожыя песні.
Айцец-музыка не разгубіўся і падтрымаў імправізаваны хор на сваім альце.
