Урад Нікарагуа пацвердзіў, што затрыманы ў 2022 годзе біскуп Матагальпы, а таксама біскуп Сіуны, два семінарысты і пятнаццаць святароў былі вызвалены з турмы.
Пра гэта паведамляе Беларуская рэдакцыя Vatican News.
Дзевятнаццаць прадстаўнікоў Каталіцкага Касцёла, сярод якіх біскупы Раландо Альварэс, Ізыдор дэль Кармэн Мора Артэга, два семінарысты і пятнаццаць святароў, былі вызваленыя з турэмнага зняволення. Навіна, распаўсюджаная мясцовымі СМІ, была пацверджана ўрадам Нікарагуа. Усе вызваленыя, за выключэннем аднаго чалавека, які застаўся ў Венесуэле, прыбылі 14 студзеня 2024 года ў другой палове дня ў Рым. Іх прымае Святы Пасад.
Монсеньёр Альварэс, біскуп Матагальпы і апостальскі адміністратар дыяцэзіі Эстэлі, быў асуджаны на 26 гадоў турэмнага зняволення і знаходзіўся ў турме з лютага 2023 года. Да гэтага ён утрымліваўся пад хатнім арыштам. Біскуп Мора быў арыштаваны ў снежні 2023 года года.
1 студзеня 2024 года, падчас сустрэчы з вернікамі на малітве Анёл Панскі, Папа выказаў сваю заклапочанасць сітуацыяй у Нікарагуа, заклікаўшы да «шляху дыялогу, каб пераадолець цяжкасці».
У кастрычніку 2023 года з турмы былі вызваленыя дванаццаць нікарагуанскіх святароў. Святы Пасад таксама прыняў іх у Рыме.
