Суд Нікарагуа прысудзіў каталіцкага біскупа Матагальпы Раландо Альварэса да 26 гадоў пазбаўлення волі на наступны дзень пасля таго, як той адмовіўся сесці на борт самалёта, які перавозіў 222 палітычных зняволеных у выгнанне ў ЗША.
Як паведаміла 11 лютага Беларуская рэдакцыя парталу Vatican News, суд прызнаў 56-гадовага іерарха «здраднікам краіны» і пастанавіў, што ён не будзе вызвалены з турмы да 2049 года. Біскуп быў пазбаўлены нікарагуанскага грамадзянства і аштрафаваны на 1600 даляраў.
Паліцыя арыштавала біскупа Альварэса ў жніўні 2022 года. Суды абвінавацілі яго ў «змове» і распаўсюдзе «фальшывых звестак».
Іерарх адкрыта крытыкаваў тое, што лічыў абмежаваннем рэлігійнай свабоды з боку левага рэжыму Артэгі.
Адносіны паміж Каталіцкім Касцёлам і ўладамі Нікарагуа знаходзяцца ў крызісе з 2018 года, калі пратэстоўцы, якія патрабавалі адстаўкі прэзідэнта, схаваліся ў святынях. Тады Артэга абвінаваціў католікаў у саўдзеле ў спробе дзяржаўнага перавароту, нібыта ініцыяванага Вашынгтонам. Улады выслалі з краіны Апостальскага нунцыя арцыбіскупа Вальдэмара Зомертага, а ў ліпені — 18 сясцёр з Ордэна місіянерак любові.
