Пошук

29.12.2023 11:38   Паводле: Misyjne.pl / Пераклад: Аляксандра Шпілеўская / Фота: афіцыйная старонка супольнасці Тэзэ ў Facebook / Catholic.by

28 снежня у Любляне (Славенія) распачалася Еўрапейская сустрэча моладзі, арганізаваная экуменічнай супольнасцю Тэзэ.

Як паведамляе Misyjne.pl, мерапрыемства праходзіць ужо ў 46-ы раз.

Сустрэча арганізавана экуменічнай супольнасцю Тэзэ ў супрацоўніцтве з мясцовымі хрысцяінскімі Касцёламі і пры падтрымцы гарадскіх уладаў Любляны. Мерапрыемства працягнецца да панядзелка 1 студзеня 2024 года.

Сёлета ў Еўрапейскай сустрэчы моладзі ўзялі ўдзел каля 5-і тысяч чалавек з 48-і краін свету.

У першы дзень падчас вечаровай малітвы ў забаўляльна-спартовай зале Arena Stožice маладых хрысціянаў розных канфесій віталі каталіцкі арцыбіскуп Любляны Станіслаў Зорэ і пастар Геза Філо, кіраўнік Славенскай лютэранскай Царквы.

У сваім разважанні прыёр Супольнасці Тэзэ брат Мэцью працытаваў ліст пад назвай «Разам у дарозе», які напісаў моладзі на 2024 год. Ён падкрэсліў, што ўсе хрысціяне з’яўляюцца «сёстрамі і братамі, аб’яднанымі ў яшчэ недасканалай, але сапраўднай камуніі».

«Хіба Хрыстус не кліча нас і не адкрывае нам дарогу, каб ісці разам з Ім як спадарожнікі па дарозе з тымі, хто жыве на ўзбочыне нашага грамадства? На гэтым шляху, у гэтым дыялогу мы хочам памятаць, што патрэбныя адно аднаму не для таго, каб навязваць сваё меркаванне, але каб спрыяць міру ў чалавечай сям’і»,

— падкрэсліў законнік.

Брат Мэцью звярнуў увагу на тое, што агульны шлях падчас сустрэчы ў Любляне з’яўляецца выразам жадання ісці за Хрыстом, а таксама невялікім унёскам у справу міру ў свеце.

Законнік адзначыў, што Езус сустракае нас у глыбіні нашых жаданняў.

«Ці гатовыя мы даверыцца Таму, хто любіць больш за ўсіх? — спытаў прыёр Супольнасці Тэзэ і дадаў — Ён заахвоціў нас быць гатовымі слухаць адзін аднаго ў гэтыя дні, бо, магчыма, дзякуючы гэтаму мы пачуем Бога, які прамаўляе да нас».

Пры выкарыстанні матэрыялаў Catholic.by спасылка абавязковая. Калі ласка, азнаёмцеся з умовамі выкарыстання

Дарагія чытачы! Catholic.by — некамерцыйны праект, існуе за кошт ахвяраванняў і дабрачыннай дапамогі. Мы просім падтрымаць нашу дзейнасць. Ці будзе наш партал існаваць далей, у значнай ступені залежыць ад вас. Шчыра дзякуем за ахвярнасць, молімся за ўсіх, хто нас падтрымлівае.

. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .
Папа Францішак

Бог заўсёды чакае нас.
Ён ніколі не губляе надзеі і заўсёды прабывае побач.