22 кастрычніка адзначаўся Сусветны дзень місій, да якога была падрыхтавана інфармацыя пра колькасць духавенства і вернікаў у Каталіцкім Касцёле.
Пра гэта паведамляе Польская рэдакцыя парталу Vatican News cа спасылкай на агенцтва Fides.
У бягучай версіі прадстаўлена інфармацыя, сабраная да 31 снежня 2021 года.
Ёсць некаторыя змены ў параўнанні з папярэднім перыядам.
Доля вернікаў Касцёла ў свеце нязначна знізілася — на 0,06%.
Колькасць католікаў зменшылася ў Еўропе на 244 тыс. разам з лічбай усяго насельніцтва, якое скарацілася у Старым свеце на 224 тыс. чалавек.
У кантынентальным маштабе лічба толькі нязначна павялічылася ў Афрыцы і Амерыцы. Варта адзначыць, што Амерыка прадстаўлена ў статыстыцы як адзін кантынент.
Відавочна зменшылася колькасць святароў, семінарыстаў, законнікаў і законніц, а таксама місіянераў і свецкіх катэхетаў.
Рост у гэтых групах назіраўся толькі ў Афрыцы, а ў большасці з іх — таксама ў Азіі.
У прадстаўленай статыстыцы на аднаго святара ў свеце прыпадае 3373 католіка, на 59 больш, чым у дадзеных за папярэдні перыяд.
Рост колькасці пастаянных дыяканаў — з’ява, якая закранае ўсе кантыненты. У новай статыстыцы ў 2021 годзе іх было 49 774, гэта значыць на 541 больш, чым у папярэдні перыяд.
