![](/3/images/news/2023/09/2023-09-06-zadarko.jpg)
5 верасня ў Варшаве адбылася сустрэча Старшыні Рады па справах мігрантаў, турызму і пілігрымак Канферэнцыі Епіскапату Польшчы біскупа Кшыштафа Задарка з душпастырамі беларусаў каталіцкага веравызнання.
Іерарх абмеркаваў са святарамі актуальныя праблемы і выклікі, якія стаяць перад душпастырствамі беларусаў у Польшчы. Плануецца, што гэтыя пытанні будуць абмяркоўвацца на наступным пасяджэнні Епіскапату Польшчы ў лістападзе 2023 годзе.
Старшыня Рады па справах мігрантаў пазнаёміўся з прысутнымі святарамі з Беларусі і актуальным станам беларускіх душпастырстваў. Было зазначана, што іх дзейнасць павінна кіравацца інструкцыяй Апостальскай Сталіцы Erga Migrantes, якая з’яўляецца адказам на патрэбы супольнасцяў мігрантаў. Прысутныя пагадзіліся, што адным з прыярытэтаў душпастырстваў беларусаў у Польшчы з’яўляецца вырашэнне ўсіх кананічных пытанняў і ўрэгуляванне іх статусу адпаведнымі біскупскімі дэкрэтамі.
Душпастырствы беларусаў у Польшчы існуюць ужо некалькі гадоў у шэрагу гарадоў. З цягам часу ўсё больш беларусаў-католікаў наведваюць святыя Імшы на роднай мове і далучаюцца да супольнасцяў.
Падрабязную інфармацыю пра сустрэчы і кантакты супольнасцяў у розных гарадах можна знайсці ТУТ>>>