16 красавіка, у другую Велікодную нядзелю, якая ў Касцёле адзначаецца як нядзеля Божай Міласэрнасці, беларусы каталіцкага веравызнаньня Маскоўскага рэгіёна (Расія) сабраліся на супольную малітву на роднай мове.
Традыцыйна ў маскоўскім кляштары айцоў францішканаў беларусы-католікі, якія жывуць у сталіцы суседняй дзяржавы, узялі ўдзел у святой Імшы, а таксама ў пастырскай сустрэчы.
Свята Божай Міласэрнасці было ўстаноўлена ў Касцёле ў лістападзе 2000 года Папам Янам Паўлам ІІ, з якім некаторыя з прысутных сустракаліся пры жыцці гэтага Пантыфіка, які цяпер з’яўляецца святым.
Падчас Эўхарыстычнай адарацыі вернікі маліліся набажэнства да Божай Міласэрнасці, складалі падзяку Пану Езусу за атрымаыя дары і прасілі аб дапамозе ў нявырашаных справах.
Душпастыр беларусаў-католікаў Маскоўскага рэгіёна айцец Пётр Карнелюк OFMConv, які цэлебраваў Імшу, асабліва адзначыў, што Божая Міласэрнасць — гэта прытулак і выратаванне для ўсіх душаў: і тых, якія шануюць Пана, і для душаў абыякавах і няверуючых, а таксама для душаў у чысцы.
Святар нагадаў, што «мы маем тры спосабы ажыццяўляць міласэрнасць да бліжніх: учынкам, словам і малтвай», як казаў Езус у аб’яўленнях святой сястры Фаўстыне.
