11 сакавіка беларуская каталіцкая моладзь, якая вучыцца і жыве ў Варшаве, зладзіла пілігрымку ў Кальварыю Зэбжыдоўскую, дзе знаходзіцца вядомы ў Польшчы санктуарый, і па дарозе наведала самы стары кляштар у Польшчы.
Адной з велікапосных традыцый у моладзевым душпастырстве з’яўляецца дзень засяроджання. У мінулыя гады ён праходзіў у парафіі святой Фаўстыны ў Варшаве, дзе нясе служэнне душпастыр тутэйшай беларускай моладзі ксёндз Яўген Вінтоў, або ў парафіі святога Аляксандра, дзе збіраюцца на малітву мясцовыя беларусы.
У гэтым годзе ксёндз Яўген прапанаваў выезд у Кальварыю Зэбжыдоўскую, дзе знаходзіцца вядомы пасійны і марыйны санктуарый Маці Божай, а таксама кляштар айцоў бэрнардынаў.
У праграме дня была святая Імша перад абразом Маці Божай Кальварыйскай, Ружанец і экскурсія па комплексе.
Месца, як падказвае сама назва, знакамітае перадусім размешчанай тут Кальварыяй — Крыжовым шляхам даўжынёй у пяць кіламетраў, што ўтвараюць 42 капліцы. Гэтае адмысловае месца культу ўнесена нават у спіс ЮНЕСКА.
На жаль, надвор’е не дазволіла правесці набажэнства на вуліцы, таму моладзь малілася Крыжовы шлях ужо ў дарозе.
Па дарозе ў Варшаву заехалі ў Тынец, што ў Кракаўскай дыяцэзіі, дзе наведалі найстарэйшы з усіх кляштараў у Польшчы — старадаўняе абацтва бэнэдыктынаў — і прысутнічалі на прыгожай літургіі малітвы Нешпараў.
Падчас пілігрымкі моладзь не толькі малілася ў інтэнцыі Беларусі і беларускіх душпастырстваў у Польшчы, але і абмеркавала сумесныя сустрэчы і будучыя выезды.
Моладзевыя сустрэчы ў Варшаые адбываюцца па панядзелках пасля святой Імшы а 18-й гадзіне ў парафіі святога Аляксандра (плошча Трох Крыжоў).
