У Сірыі, якая разам з Турцыяй моцна пацярпела ад серыі падземных штуршкоў 6 лютага, кляштары і святыні розных хрысціянскіх канфесій — мараніцкай, каталіцкай, праваслаўнай, грэка-каталіцкай і іншых — адчыняюць свае дзверы, каб даць прытулак тым, хто застаўся без даху над галавою з прычыны землятрусу.
Як паведамляецца на сайце slovoproslovo.info, рэлігійныя лідары розных супольнасцяў падкрэсліваюць, што яны радыя ўсім, незалежна ад веравызнання, нацыянальнасці ці палітычных поглядаў.
«Гэта адчайдушная гуманітарная сітуацыя», — сказаў журналістам халдэйскі каталіцкі арцыбіскуп Алепа Антуан Одо. У яго рэзідэнцыі пражывае каля 50-і асоб, сярод якіх як пажылыя людзі, так і зусім маленькія немаўляты. Іншыя знайшлі прытулак у мараніцкай катэдры святога Іллі, 1600 — у грэчаскім праваслаўным епіскапаце і больш за 2 тыс. — у францішканскім кляштары ў Алепа.
«Няма электрычнасці, няма паліва, зіма вельмі суровая, зімна ўсярэдзіне і звонку. Там вельмі шмат бядоты», — распавядае арцыбіскуп Одо.
Цэнтры надзеі «Адчыненыя дзверы» сёння ахопліваюць каля 5400 асоб. Яны раздаюць двухразовае харчаванне, пераважна бутэрброды, а таксама даюць коўдры і месца для адпачынку. Валанцёры і духоўныя асобы слухаюць, як людзі дзеляцца перажытым.
«Мы бачым, што шмат людзей успрымаюць гэта як знак, каб глыбей угрунтавацца ў сваёй веры, — кажа супрацоўніца дабрачыннай арганізацыі Лэйла Самар. — Пэўная сям’я, жанчына, якая жыве на пятым паверсе дома са сваёй пажылой маці і сынам, падзялілася з намі, як яны ўцякалі, калі будынак пачаў руйнавацца. Яе сын, няверуючы, усклікаў з падзякай Богу, калі яны ўратаваліся».
Нагадаем, што каталіцкія біскупы Беларусі скіравалі Паведамленне да духавенства, кансэкраваных асоб і ўсіх вернікаў, у якім запрашаюць да малітвы за пацярпелых ад землятрусу ў Турцыі і Сірыі, а таксама ад войнаў у розных частках свету.
