Супольнасць сясцёр Кангрэгацыі Дачок Марыі Беззаганнай у Беларусі са смуткам паведамляе, што ў суботу 24 верасня на 53-м годзе жыцця адышла ў вечнасць Генеральная настаяцельніца кангрэгацыі сястра Агата Мірэк.
Агата Мірэк нарадзілася 8 красавіка 1970 года. Была гісторыкам, прафесарам гуманітарных навук, супрацоўніцай Люблінскага каталіцкага ўніверсітэта. Аўтарка шматлікіх навуковых артыкулаў і шэрагу кніг, у тым ліку прысвечаных дзейнасці манаскіх супольнасцяў у часы камуністычнага пераследу Касцёла. Неаднаразова наведвала супольнасці сваёй кангрэгацыі ў Беларусі.
«Нашае асноўнае заданне — набліжаць Бога праз штодзённае жыццё, а не праз вялікія маніфестацыі. Мы не хочам стаяць на п’едэстале, але ісці разам з іншымі шляхам хрысціянскага паклікання. Хочам сярод гэтага свету быць сведкамі жывой веры, молячыся, стоячы ў чэргах, гатуючы абед, або мыючы бялізну», — казала сястра Агата Мірэк.
Сёстры Кангрэгацыі Дачок Марыі Беззаганнай у Беларусі нясуць служэнне пры парафіі Святой Сям’і ў Лідзе (Гродзенская дыяцэзія) і пры парафіі святога Мікалая, біскупа, у Свіры (Мінска-Магілёўская архідыяцэзія).
Парадак жалобных набажэнстваў
- Жалобная святая Імша за спачылую будзе цэлебравацца ў чацвер 29 верасня ў касцёле пры Люблінскім каталіцкім універсітэце.
Пачатак у 13.30.
Перад Імшой а 12-й гадзіне адбудзецца ружанцовая малітва. - Пахавальная святая Імша адбудзецца 30 верасня ў касцёле Меншых Братоў Капуцынаў у Новым Месцы над Піліцай (Мазавецкае ваяводства, Польшча).
Пачатак а 12-й гадзіне.
Перад Імшой у 11.15 адбудзецца ружанцовая малітва. - Пахаванне адбудзецца на парафіяльных могілках у Новым Месцы.
Вечны адпачынак дай ёй, Пане…
