1 верасня ў Польшчы адбылося пахаванне ксяндза Станіслава Паўліны, арыяніста.
Спачылы святар доўгі час быў бліжэйшым супрацоўнікам кардынала Казіміра Свёнтка і прычыніўся да адраджэння структур Каталіцкаша Касцёла ў Беларусі. Ён адышоў у вечнасць 29 жніўня на 90-м годзе жыцця.
Шматлікія святары і вернікі, знаёмыя і родныя сабраліся разам у парафіі Святога Луіджы Арыёне ў Варшаве, каб Божай Міласэрнасці даручыць памерлага ксяндза Станіслава.
На пахаванне былога канцлера Пінскай дыяцэзіяльнай курыі і бліжэйшага супрацоўніка кардынала Казіміра Свёнтка прыбылі некаторыя святары, якія нясуць або неслі святарскую паслугу ў Беларусі на чале з Генеральным вікарыем Пінскай дыяцэзіі біскупам Казімірам Велікасельцам. Сярод іх наступнік ксяндза Паўліны на пасадзе канцлера ксёндз Андрэй Рылка, ксёндз Ян Саламон з Ганцавічаў, айцец Леанард Адушкевіч з Гомеля, ксёндз канонік Багуслаў Маджэеўскі са Свіра, ксёндз Януш Чарнамораў з Нароўлі, ксёндз Славамір Ляскоўскі, ксёндз Юзаф Дзеконьскі і ксёндз Міраслаў Жлабінскі.
Прыбылі таксама прадстаўнікі катэдральнай парафіі ў Пінску, у якой ксёндз Станіслаў быў пробашчам амаль 20 гадоў.
Цэлебрацыю пахавальнай святой Імшы, а таксама абрады апошняга даручэння і развітання ўзначаліў арцыбіскуп Варшаўскі кардынал Казімір Ныч.
Напрыканцы святой Імшы канцлер курыі Пінскай дыяцэзіі ксёндз Андрэй Рылка прачытаў ліст пастыра Пінскай дыяцэзіі біскупа Антонія Дзям’янкі.
Іерарх выказаў словы спачування і адзначыў вялікі ўнёсак спачылага ксяндза Станіслава ў адраджэнні касцёльных структур на Беларусі, а таксама руплівасць і клопат святара ў адданым служэнні Богу і людзям.
На заканчэнне цэлебрацыі Правінцыял законніцкай супольнасці ксяндзоў рыяністаў ксёндз Кшыштаф Місь FDP выказаў словы спачування родным памерлага, а таксама падзякаваў прадстаўнікам Касцёла на Беларусі за ўдзел у пахаванні.
Пасля гэтага пахавальная працэсія скіравалася на могілкі ў Лазневе каля Варшавы, дзе біскуп Казімір Велікаселец узначаліў абрады пахавання, на заканчэнне якіх удзяліў благаслаўленне ўдзельнікам.
