Увечары 5 красавіка у Львове адбылася экуменічная малітва за ахвяр вайны, якая з 24 лютага ідзе ва Украіне.
Як паведаміў сайт Львоўскай архідыяцэзіі Рыма-Каталіцкага Касцёла ва Украіне rkc.lviv.ua, прадстаўнікі ўсіх веравызнанняў шматканфесійнага горада сабраліся на плошчы каля помніка Тарасу Шаўчэнку, каб разам памаліцца аб вечным супакоі для кожнага нявінна закатаванага дзіцяці, жанчыны; за кожную цывільную асобу, чыё жыццё абарвалася ад рук ваенных злачынцаў.
Сабраныя маліліся таксама за загінулых вайскоўцаў, якія аддалі жыццё, абараняючы сваю Бацькаўшчыну ад захопнікаў і забойцаў.
Ад Каталіцкага Касцёла ўдзел у міжканфесійнай малітве ўзяў дапаможны біскуп Львоўскай архідыяцэзіі Эдвард Кава. Іерарх упэўнены, што перамагчы ў гэтай вайне без малітвы немагчыма; што зброі і дыпламатыі недастаткова, каб спыніць гэтае зло, што распаўсюджваецца па ўкраінскай зямлі.
«Гэтая малітва, якую мы толькі што правялі ў самым сэрцы Львова за ахвяр вайны, што працягваецца на тэрыторыі нашай дзяржавы вось ужо 41-ы дзень, вельмі нам патрэбная.
Без малітвы мы не адолеем гэтае зло, якое прыйшло ў нашую краіну.
Відаць, што ўсе гэтыя злачынствы над дзецьмі, жанчынамі, над людзьмі пажылога ўзросту, над безабаронным цывільным насельніцтвам здзяйсняюцца нейкім апантаным чынам. Гэта ўжо не чалавечая злосць — гэта апантанасць злога, што праяўляецца ў гэтых злачынцах, якія здзяйсняюць гэтыя масавыя забойствы, гэты генацыд украінскага народа.
Таму мы не спынім гэтай вайны толькі мілітарнымі сродкамі ці дыпламатычным шляхам. Тут без малітвы і посту мы не справімся.
Таму ўсе мы ва Украіне павінны больш маліцца. Асабліва там, дзе праліваецца нявінная кроў безабаронных. Але просім таксама і ўвесь свет аб малітве», — сказаў біскуп Эдвард Кава.
