Тры каталіцкія святары на Філіпінах трапілі пад кананічнае пакаранне пасля таго, як выказалі намер удзельнічаць у выбарах на палітычныя пасады.
Як са спасылкай на Канферэнцыю біскупаў Філіпін паведаміла Каталіцкае інфармацыйнае агенцтва КАІ, духоўныя асобы з трох дыяцэзій краіны атрымалі ад сваіх ардынарыяў дэкрэты аб санкцыі суспенсы.
Кодэкс кананічнага права Каталіцкага Касцёла накладае безумоўную забарону на здзяйсненне духоўнымі асобамі грамадскіх функцый, з якімі звязана выкананне свецкай улады (гл. кан. 285 §3 ККП), забарону ўдзелу ў таварыствах, несумяшчальных з абавязкамі духоўных асоб (кан. 278 §3 KКП, а таксама адносную забарону актыўнага ўдзелу ў палітычных партыях або ў кіраванні прафесійнымі саюзамі (кан. 287 §2 KКП). Усе абмежаванні, якія датычацца грамадскай дзейнасці духавенства, можна разглядаць выключна на падставе кананічнага права.
Адзін з біскупаў назваў рашэнне свайго святара заняцца палітыкай «сумным фактам», адзначыўшы, што ксёндз «вырашыў адмовіцца ад святарскага служэння з асабістых матываў».
У сувязі з гэтым ён больш не можа прадстаўляць Каталіцкага Касцёла і дыяцэзіі, хоць па-ранейшаму абавязаны жыць у цэлібаце.
Дэкрэты пазбаўляюць святароў таксама іх пасад у касцёльных структурах, а кожны з іх да гэтага часу кіраваў офісамі па гуманітарнай дапамозе пры Caritas у сваіх дыяцэзіях.
Паведамляецца, што святары выказалі жаданне ўдзельнічаць у мясцовых і муніцыпальных выбарах, за што і былі пазбаўлены сану.
