23 мая, ва ўрачыстасць Спаслання Духа Святога, у капліцы францішканскага кляштара ў Маскве перад святой Імшой на беларускай мове адбылося традыцыйнае Маёвае набажэнства перад выстаўленым Найсвяцейшым Сакрамэнтам і абразом Маці Божай Будслаўскай.
Вернікі разам праслаўлялі Бога, перапрашалі за грахі, з надзяй і любоўю ўзносілі супольныя малітвы, у тым ліку і аб адбудове пацярпелага ад пажару санктуарыя ў Будславе.
Урачыстасць спаслання Духа Святога — гэта свята прыняцця людзьмі Духа Жыцця і Праўды, Духа-Суцяшыцеля, Духа-Пераможцы. Толькі дзякуючы дарам Духа Святога чалавек можа прыняць усю паўнату веры, быць свабодным ад граху, ілжы і несправядлівасці.
Падчас святой Імшы ва ўрачыстасць Пяцідзесятніцы маскоўскія католікі асабліва маліліся за тых, хто пакутуе за праўду з-за ілжывых сведчанняў, з-за дзеянняў тых, хто адмаўляецца прыняць Духа Святога; за тых, хто моцна пацярпеў за праўду.
Хрысціяне жывуць упэўненасцю ў тым, што толькі праўда і вера ў Бога ў Тройцы Адзінага перамагае цемру; што толькі з Духам Святым магчыма зрабіць свет больш шчаслівым. Хрыстус, які перамог зло і смерць, падбадзёрвае сваіх вучняў: «Гэта Я сказаў вам, каб вы мелі ўва Мне спакой. У свеце зведаеце ўціск, але будзьце адважнымі: Я перамог свет» (Ян 16, 29–33).
Беларусы-католікі Масквы ўдзячныя айцу Пятру Карнелюку OFMConv, які цэлебраваў для іх Імшу на роднай мове, і братам францішканам, якія заўседы з Божаю любоўю прымаюць беларускую каталіцкую суполку расійскай сталіцы ў капліцы свайго кляштару. З гэтага часу малітвы па-беларуску перад Найсвяцешым Сакрамэнтам плануецца праводзіць штомесяц.
