Пасля працяглага перапынку, выкліканага пандэміяй каранавірусу, экуменічная супольнасць Тэзэ на паўднёвым усходзе Францыі з 3 мая зноў пачынае прымаць маладых людзей.
Пра гэта паведамляе Беларуская рэдакцыя парталу Vatican News.
Вёска Тэзэ на поўдні Бургундыі стала сімвалам экуменічнага руху.
Створаная ў 1940-х гадах, супольнасць — гэта месца, куды прыязджае моладзь розных хрысціянскіх веравызнанняў з усяго свету. Тут ёй апякуюцца больш за 100 братоў з 25-і краін.
Сярод іх ёсць католікі і пратэстанты розных дэнамінацый.
Некаторыя браты жывуць у невялікіх супольнасцях — брацтвах — у Азіі, Афрыцы і Паўднёвай Амерыцы, дзеляць жыццё з бяздомнымі дзецьмі, зняволенымі, паміраючымі і самотнымі. Браты Тэзэ як манахі даюць абяцанні жыць у беднасці, бясшлюбнасці і паслухмянасці. Акрамя экуменізму, галоўным пунктам іх працы сёння з’яўляецца салідарнасць з людзьмі беднымі і пазбаўленымі правоў.
Штогод, асабліва ў летні перыяд, Тэзэ наведваюць тысячы пілігрымаў, якія жадаюць правесці час у цішыні і разважанні над Божым словам. У навагодні час супольнасць арганізуе еўрапейскія сустрэчы моладзі ў адным з буйных гарадоў кантынента.
