13 мая санктуарый Маці Божай Ружанцовай у Фаціме стане адным з месцаў малітваў аб заканчэнні пандэміі Covid-19 у межах абвешчанай Святым Пасадам сусветнай малітоўнай акцыі.
Малітоўны марафон распачнецца 1 мая набажэнствам у Ватыкане ў лучнасці з марыйным санктуарыем у англійскім Уолсінгеме і будзе працягвацца ўвесь май, штодзённа яднаючыся анлайн з рознымі санктуарыямі свету. Так, напрыклад, плануюцца трансляцыі з суседніх для Беларусі Польшчы і Украіны: 3 мая — з санктуарыя на Яснай Гары ў польскай Чэнстахове, 27 мая — з грэка-каталіцкага санктуарыя ва ўкраінскай вёсцы Зарваніца.
13 мая — гэта дзень, на які прыпадае чарговая гадавіна аб’яўленняў Маці Божай у Фаціме.
Як паведамляе Каталіцкае інфармацыйнае агенцтва КАІ, малітва распачнецца ў капліцы аб’яўленняў. Набажэнства ўзначаліць кардынал Антонію Марту.
Нягледзячы на тое, што з 27 красавіка ў Партугаліі будзе спынены лакдаўн, пра што паведаміў прэзідэнт краіны Марсэлу Рэбэлу ды Соза, урачыстасці ў Фаціме пройдуць з захаваннем строгіх эпідэміялагічных нормаў.
Адказнай за правядзенне малітоўнага марафону з’яўляецца Папская рада па развіцці новай Евангелізацыі. Акрамя галоўнай інтэнцыі аб спыненні пандэміі ў кожным месцы будзе таксама свая малітоўнай просьба. У Фаціме памоляцца за вязняў.
Спіс санктуарыяў, з якіх будзе арганізавана трансляцыя набажэнстваў у межах сусветнай малітвы аб спыненні пандэміі:
- 1 мая — ватыканская базыліка ў лучнасці з санктуарыем Маці Божай ва Уолсінгеме (Англія)
- 2 мая — санктуарый Збаўцы Езуса і Маці Божай у Элеле (Нігерыя)
- 3 мая — санктуарый Маці Божай Чэнстахоўскай на Яснай Гары (Польшча)
- 4 мая — базыліка Звеставання Пана ў Назарэце (Ізраіль)
- 5 мая — санктуарый Маці Божай Ружанцовай у Нам’янгу (Паўднёвая Карэя)
- 6 мая — санктуарый Маці Божай у Апарэсідзе (Бразілія)
- 7 мая — санктуарый Маці Божай Супакою і Добрага шляху ў Антыпола (Філіпіны)
- 8 мая — санктуарый Маці Божай у Лухане (Аргенціна)
- 9 мая — малая базыліка ў Ларэта (Італія)
- 10 мая — санктуарый Маці Божай у вёсцы Нок (Ірландыя)
- 11 мая — санктуарый Маці Божай бедных у Банё (Бельгія)
- 12 мая — базыліка Маці Божай Афрыканскай у Алжыры (Алжыр)
- 13 мая — санктуарый Маці Божай Ружанцовай у Фаціме (Партугалія)
- 14 мая — санктуарый Аздараўлення хворых у Вэланкані (Індыя)
- 15 мая — санктуарый Маці Божай Каралевы Супакою ў Меджугор’і (Боснія і Герцагавіна)
- 16 мая — катэдра Маці Божай у Сіднэі (Аўстралія)
- 17 мая — базыліка Беззаганнага Зачацця ў Вашынгтоне (ЗША)
- 18 мая — санктуарый Маці Божай у Лурдзе (Францыя)
- 19 мая — Дом Найсвяцейшай Панны Марыі ў Эфесе (Турцыя)
- 20 мая — санктуарый Маці Божай Міласэрнасці ў Эль-Кобрэ (Куба)
- 21 мая — санктуарый у Нагасакі (Японія)
- 22 мая — бэнэдэктынскі кляштар Маці Божай у Мансэраце (Іспанія)
- 23 мая — базыліка Найсвяцейшай Панны Марыі ў Квэбеку (Канада)
- 24 мая (інфармацыя будзе пададзена пазней)
- 25 мая — базыліка Маці Божай Та’Піну на востраве Гоца (Мальта)
- 26 мая — базыліка Маці Божай у Гвадэлупе (Мексіка)
- 27 мая — грэка-каталіцкі санктуарый Маці Божай у Зарваніцы (Украіна)
- 28 мая — санктуарый Маці Божай у Альцётынгу (Германія)
- 29 мая — санктуарый Каралевы Лівана на пагорку Харыса (Ліван)
- 30 мая — санктуарый Маці Божай Ружанцовай у Пампеях (Італія)
- 31 мая — Лурдскі грот у Ватыканскіх садах (набажэнства ўзначаліць Папа Францішак).
