На працягу мая каля галоўнага алтара міланскай катэдры будзе цалкам прачытана «Боская камедыя» Дантэ Аліг’еры. «Дантэ ў катэдры» — гэта культурны праект, прымеркаваны да 700-годдзя з дня смерці вялікага паэта Адраджэння.
Як паведамляе руская рэдакцыя парталу Vatican News, ідэя гэтага незвычайнага мерапрыемства належыць пробашчу катэдры ў Мілане ксяндзу прэлату Джанантоніо Барганова і іншым святарам, якія нясуць служэнне ў гэтай парафіі.
Культурны праект будзе рэалізаваны ў супрацоўніцтве з Амбразіянскай бібліятэкай і «Дастойнай майстэрняй міланскай катэдры» (Veneranda Fabbrica del Duomo di Milano) — арганізацыяй з 600-гадовай гісторыяй, створанай для назірання за будаўніцтвам міланскай катэдры, якая сёння займаецца захаваннем святыні і папулярызацыяй яе культурнай спадчыны.
Чытанне «Боскай камедыі» будзе адбывацца з музычным суправаджэннем у выкананні артыстаў аркестра славутага тэатра «Ла Скала».
У праекце прымуць удзел і навучэнцы Малога тэатра Мілана.
Арганізатары выказваюць надзею, што гэтая важная падзея будзе прадвеснікам культурнага адраджэння горада пасля доўгага перапынку, выкліканага пандэміяй.
