15 сакавіка адбылася афіцыйная перадача ва ўласнасць Рыма-каталіцкай Архідыяцэзіі Маці Божай у Маскве будынку каталіцкай святыні святых Апосталаў Пятра і Паўла ў Вялікім Ноўгарадзе (Расія).
Як паведамляе cathmos.ru, касцёл быў узведзены ў Сафійскай частцы горада ў канцы XIX стагоддзя.
Кансэкрацыя святыні адбылася ў 1893 годзе.
У 1933 годзе савецкія ўлады закрылі касцёл і ў сакральным будынку пачаў дзейнічаць кінатэатр «Родина».
У 1996 годзе святыню перадалі ў карыстанне адроджанай мясцовай каталіцкай парафіі. У 2009–2010 гадах ў межах федэральнай праграмы былі адноўлены вежы святыні, знесеныя ў савецкі час.
Будынак касцёла ў адным з самых старажытных гарадоў Расіі з’яўляецца помнікам федэральнага значэння.
Радасць вяртання святыні з католікамі Вялікага Ноўгарада раздзяліў дапаможны біскуп Мікалай Дубінін, які 13-14 сакавіка знаходзіўся ў парафіі Святых Апосталаў Пятра і Паўла з пастырскім візітам.
Іеарарх сустрэўся з парафіяльнай радай і ўзначаліў цэлебрацыю нядзельнай святой Імшы.
