19 лютага, у першую пятніцу Вялікага посту, каталіцкія супольнасці ў многіх краінах свету праводзяць Дзень малітвы за ахвяр злоўжыванняў.
«Малітва з’яўляецца часткай працэсу аздараўлення для людзей, якія сталі ахвярамі сексуальных злачынстваў, для членаў іх сем’яў і супольнасцей вернікаў», — падкрэсліваецца на новым сайце Папскай камісіі па абароне непаўналетніх, словы якога перадае беларуская рэдакцыя парталу Vatican News.
Інтэрнэт-партал пачаў працаваць некалькі дзён таму. На ім можна знайсці матэрыялы, рэкамендаваныя для арганізацыі Дня малітвы на ўзроўні мясцовых Касцёлаў.
Паведамляецца, што 19 лютага адпаведныя духоўныя ініцыятывы будуць рэалізаваныя ў некалькіх дзясятках каталіцкіх супольнасцяў.
Адмысловыя набажэнствы запланаваныя ў Ірландыі, Шатландыі і Польшчы.
У 2016 годзе Папа Францішак звярнуўся да епіскапатаў ва ўсім свеце з заклікам прысвяціць адзін дзень на працягу літургічнага года асаблівай малітве за ахвяр сексуальных злачынстваў.
У Аўстраліі яго сталі адзначаць 11 верасня, спалучаючы з Нацыянальным днём абароны дзяцей. Канферэнцыя Біскупаў Паўднёвай Афрыкі прысвяціла ініцыятыве тры дні ў перыяд Адвэнту. Некаторыя Касцёлы ў Еўропе праводзяць Дзень малітвы і посту ў інтэнцыі ахвяр злоўжыванняў у нядзелю перад Сусветным днём дзіцяці, які адзначаецца 20 лістапада.
