З прапановай стварыць Еўрапейскі сінод, які сабраў бы біскупаў кантынента на абмеркаванне гарачых тэм, выступіў старшыня Камісіі Біскупскіх Канферэнцый Еўрапейскай Супольнасці (COMECE) арцыбіскуп Люксембуржскі кардынал Жан-Клод Ольрыш.
На думку іерарха, гэта не павінна быць спецыяльная асамблея Сіноду біскупаў (для Еўропы такія ўжо ладзіліся ў 1991 і 1999 гадах), а, хутчэй, платформа сустрэч і дыскусій для біскупаў кантынента. Пра гэта паведамляецца на партале ekai.pl са спасылкай на Katolisch.de.
Старшыня COMECE перакананы, што Еўрапейскі сінод неабходны для ўмацавання адкрытасці і выяўлення існуючых праблем, неабходны Касцёлам Еўропы, каб яны занадта не аддаліліся ад сваіх суграмадзянаў — як унутры хрысціянскай супольнасці, так і па-за ёй.
Кардынал Ольрыш разумее, што Еўрапейскі сінод будзе няпростым з прычыны розных лакальных душпастырскіх арыенціраў: «Касцёлы заўсёды думаюць праз прызму сітуацыі ў сваёй краіне». І ў той жа час, па словах старшыні камісіі, сінод паспрыяў бы распачаццю дыскусій на тэмы, якія ў кожнай краіне перажываюцца з розных перспектываў.
Адной з такіх тэм кардынал назваў пытанне міграцыі, у якой некаторыя краіны «бачаць небяспеку».
Іерарх выказаў таксама надзею, што дзякуючы сіноду атрымаюць развіццё структуры, якія дазволяць «пачуць галасы жанчын у Касцёле».
