11 студзеня ў Каіры (Егіпет) пасля сустрэчы дыпламатаў, прысвечанай мірнаму ўрэгуляванню на Блізкім Усходзе, міністры замежных спраў Германіі, Егіпта, Францыі і Ярданіі выступілі з сумеснай заявай, у якой заклікалі да захавання традыцыйнага і прававога статус-кво святых месцаў Ерузалема.
Як са спасылкай на нямецкае каталіцкае інфармацыйнае агенцтва KNA паведаміла КАІ, важную ролю ў гэтым адыгравае Ярданія, якая з’яўляецца ахоўнікам святых месцаў.
У сваёй заяве дыпламаты падкрэслілі, што важна захаваць складанасць, характар і статус палестынскіх тэрыторый і Усходняга Ерузалема, занятых Ізраілем у 1967 годзе.
На думку міністраў, неадменнаю ўмоваю міру ў рэгіёне з’яўляецца заканчэнне ізраільска-палестынскага канфлікту на прынцыпах існавання дзвюх дзяржаў. Абодва бакі канфлікту павінны адмовіцца ад любых аднабаковых дзеянняў, якія могуць нанесці шкоду справядліваму і трываламу вырашэнню канфлікта, лічаць прадстаўнікі чатырох краін.
Канкрэтна яны патрабуюць спыніць стварэнне ізраільскіх пасяленняў у тым ліку ва ўсходняй частцы Ерузалема, а таксама захоўваць гуманітарнае права народаў на палестынскіх тэрыторыях і ва Усходнім Ерузалеме, якія з 1967 года знаходзяцца пад акупацыяй.
Мэтаю стустрэчы дыпламатаў у сталіцы Егіпта было вызначэнне далейшых крокаў на шляху да паскарэння мірнага працэсу на Блізкім Усходзе ў мэтах забеспячэння трывалага міру ў рэгіёне. Праект гэтых дзеянняў будзе прадстаўлены на разгляд палестынцаў і Ізраіля.
