Кандыдат у прэзідэнты ЗША ад дэмакратычнай партыі Джозэф Байдэн, які, паводле СМІ, перамог на выбарах, 12 лістапада правёў тэлефонную размову з Папам Францішкам.
Пра гэта са спасылкай на USA Today паведаміла Каталіцкае інфармацыйнае агенцтва КАІ.
Джозэф Байдэн падзякаваў Святому Айцу за дасланыя віншаванні і благаслаўленне.
Магчымы будучы 46-ы прэзідэнт ЗША запэўніў у сваім жаданні супрацоўнічаць з Пантыфікам «на падставе агульнай веры ў годнасць і роўнасць усяго чалавецтва, у такіх пытаннях, як кліматычныя змены і прыняцце мігрантаў і бежанцаў у Злучаныя Штаты, а таксама праяўленне ўвагі да адкінутых і бедных».
Джозэф Байдэн мае ірландскія карані, вучыўся ў каталіцкай школе, лічыць сябе католікам і амаль кожны тыдзень удзельнічае ў святой Імшы ў невялікім касцёле ў сваім родным горадзе Уілмінгтан у штаце Дэлавэр.
