Дзесяць беларусаў, якія паступілі ў гэтым годзе на вучобу ў Люблінскі каталіцкі ўніверсітэт у Польшчы, былі вызваленыя ад платы за адукацыю. Акрамя таго, Фонд Яна Паўла II забяспечыў іх стыпендыямі і жыллём.
Як паведамляе КАІ, яны ўжо завяршылі ўсе фармальнасці і з 1 кастрычніка пачнуць навучанне. Усяго на першым курсе першага і другога патоку будуць вучыцца 34 беларусы. Акрамя згаданых дзесяці чалавек, у астатніх ёсць карта паляка, якая дае права на бясплатную адукацыю.
«Мы падтрымліваем студэнтаў з Беларусі не толькі цяпер, але і з дзевяностых гадоў, у тым ліку праз Фонд Яна Паўла ІІ. Як універсітэт мы даем ім магчымасць бясплатна прайсці курс польскай мовы, прапануем псіхалагічную і юрыдычную дапамогу», — адзначае прарэктар па справах студэнтаў і аспірантаў Люблінскага каталіцкага ўніверсітэта прафесар Кшыштаф Нарэцкі.
Фонд Яна Паўла II дае маладым людзям з краін былога Савецкага Саюза магчымасць атрымліваць стыпендыю (калі яны адпавядаюць крытэрыям) і забяспечвае месца пражывання, інтэрнат.
Гэтая дапамога працягваецца ўжо трыццаць гадоў.
У агульнай колькасці ў Люблінскім каталіцкім універсітэце вучацца сто беларусаў. Сярод напрамкаў яны часцей за ўсё выбіраюць псіхалогію, інфарматыку, кагнітывістыку, сацыялогію, менэджмент, міжнародныя адносіны.
