13 жніўня каталіцкія біскупы Украіны ў прамым эфіры «Радыё Марыя» маліліся за тых, хто церпіць у Ліване, Беларусі і Украіне.
Агульнаўкраінская ружанцовая малітва адбывалася на хвалях каталіцкага радыё, якое дзейнічае ў многіх краінах свету, у тым ліку тых, дзе католікі з’яўляюцца рэлігійнай меншасцю.
Па надуманых прычынах беларускія ўлады ўжо шмат гадоў адмаўляюць у рэгістрацыі «Радыё Марыя Беларусь», і пакуль яго можна слухаць толькі ў інтэрнэце.
У малітве за церпячыя народы Лівана, Беларусі і Украіны маліліся вернікі ва ўсёй суседняй краіне, якія выказваюць сваю салідарнасць і падтрымку нашаму народу ў яго законным імкненні да пашаны ягоных правоў і мірнага жыцця на сваёй зямлі.
Таямніцы Святла святога Ружанца па чарзе прамаўлялі Генеральны вікарый Харкаўска-Запарожскай дыяцэзіі біскуп Ян Сабіла; біскуп Харкаўска-Запарожскі Паўло Ганчарук, біскуп Кіева-Жытомірскі Віталій Крывіцкі SDB, біскуп Луцкі Віталій Скамароўскі і Адэска-Сімферопальскі біскуп на пенсіі Браніслаў Бярнацкі.
Кожная таямніца распачыналася кароткім разважаннем-сведчаннем біскупа, які яе праводзіў.
Распачынаючы трэцюю таямніцу Святла, прысвечаную абвяшчэнню Хрыстом Божага Валадарства, біскуп Кіева-Жытомірскі Віталій Крывіцкі SDB сказаў, што гэтага абвяшчэння Добрай Навіны цяпер асаблівым чынам прагнуць зруйнаваныя вуліцы Бейрута, знішчаны Данбас, неспакойныя праспекты Мінска.
«Сёння я размаўляў з чалавекам з Мінска, які пытаўся, задаваў пытанне: „Чаго хоча ад нас Бог?“
І менавіта людзі, якія хочуць пачуць, што гаворыць Бог у гэтую хвіліну, яны маюць адкрытае Божае Слова і пачуюць яго. Ён не пакіне сваіх дзяцей без слова. Але гэтае слова не можа прыйсці ў сэрца, заплямленае грахом. Хрыстус заклікае да пакаяння: немагчыма прыняць чыстае слова ў нячыстае сэрца. Мы ўвесь час чуем словы Багародзіцы ў Яе аб’яўленнях: Яна заклікае менавіта да малітвы і да пакаяння.
Таму молімся, каб нашыя народы правільна — у малітве і ў духу пакаяння — прымалі слова збаўлення», — падкрэсліў біскуп Віталій Крывіцкі.
Распачынаючы разважанне на чацвёртай таямніцай Святла, біскуп Луцкі Віталій Скамароўскі сказаў: «Што для нас азначае таямніца Перамянення Пана?
Перадусім яна нясе пасланне, што Бог усё можа перамяніць, нават у сітуацыях, якія па-чалавечы здаюцца безнадзейнымі, таму што Бог — усемагутны.
Гэта адносіцца да нашага асабістага, сямейнага і грамадскага жыцця. Гэта адносіцца і да праблем, якія перажываюць украінскі, беларускі і ліванскі народы. Гэтая таямніца заклікае нас да даверу Езусу і да малітвы».
Да асаблівай малітвы ва ўмовах складанай складанай грамадска-палітычнай сітуацыі ў краіне заклікаюць вернікаў і ўсіх людзей добрай волі таксама каталіцкія біскупы Беларусі.
