Японскія біскупы заклікалі цалкам адмовіцца ад выкарыстання атамнай энергіі. Гэтае рашэнне стала рэакцыяй на трагедыю на атамнай станцыі ў Фукусіме, якая адбылася ў 2011 годзе.
Як паведамляе беларуская рэдакцыя парталу Vatican News, на сайце Канферэнцыі Біскупаў Японіі быў апублікаваны зборнік «Ліквідацыя атамнай энергіі: заклік Каталіцкага Касцёла ў Японіі». У ім утрымліваюцца меркаванні міжнародных экспертаў аб наступствах атамнай катастрофы на Фукусіме, небяспеках, звязаных з валоданнем ядзернай зброяй, а таксама аналіз атамнай энергетыкі з этычнага і тэалагічнага пункту гледжання.
Спасылаючыся на энцыкліку Папы Францішка Laudato si’ і словы, якія ён прамовіў падчас візіту ў Японію, біскупы падкрэслілі, што поўная адмова ад атамнай энергетыкі — адзін з самых важных пунктаў ураўнаважанага развіцця на Зямлі.
Японія — адзіная ў свеце краіна, якая спазнала разбуральныя наступствы ядзернай бамбардзіроўкі.
На працягу апошніх дзесяцігоддзяў біскупы рэгулярна заклікаюць да пошуку альтэрнатыўных і бяспечных крыніц энергіі. Заклік да поўнай адмовы ад выкарыстання мірнага атаму стаў чарговым крокам у гэтым кірунку.
