У нядзелю 21 чэрвеня была пацверджана ўспышка каранавірусу ў марыйным санктуарыі ў партугальскай Фаціме, але санктуарый застанецца адкрытым для пілігрымаў.
Як паведаміла Каталіцкае інфармацыйнае агенцтва КАІ, у выніку тэстаў на прысутнасць вірусу SARS-CoV-2 супрацоўнікі службы аховы здароўя пацвердзілі 16 выпадкаў заражэння ў тых, хто працуе ў гэтым вельмі папулярным у вернікаў месцы культу.
Усяго былі абследаваны 244 чалавекі, які працуюць на тэрыторыі фацімскага санктуарыя, а таксама па-за ім. У спецыяльным паведамлені рэктарат санктуарыя растлумачыў, што ў найбліжэйшы час будуць зроблены яшчэ 70 тэстаў у астатніх супрацоўнікаў.
Было таксама паведамлена, што 16 інфіцыяваных — гэта ўдзельнікі хору, якія не мелі кантакту з пілігрымамі.
Кіраўніцтва санктуарыя ў Фаціме інфармуе, што масавыя тэсты былі праведзены пасля выяўлення ў аднаго з супрацоўнікаў захворвання на COVID-19.
Цэлебрацыя святых Імшаў з удзелам вернікаў у фацімскім санктуарыі пасля каранціну, які працягваўся з сярэдзіны сакавіка, былі адноўлены толькі 30 мая. Пры гэтым тут дзейнічаюць абмежаванні і строгія санітарныя правілы: неабходна захоўваць адлегласць у два метры паміж вернікамі, а таксама абавязкова выкарыстанне масак.
