На працягу летніх месяцаў у Парыжы плануюць дэмантаваць будаўнічыя рыштаванні, усталяваныя для правядзення рэстаўрацыйных прац на шпілі катэдры Нотр-Дам і пашкоджаныя ў выніку леташняга пажару ў святыні.
Як паведамляе інфармацыйная служба Euronews, полымя часткова расплавіла і дэфармавала металічныя канструкцыі, агульная вага якіх складае каля 200 тон. Цяпер рабочым трэба будзе разабраць каля 40 тысяч металічных бэлек і спусціць іх з 40-метровай вышыні з дапамогаю крана.
У фондзе Нртр-Дам адзначаюць, што аперацыя па дэмантажу вельмі рызыкоўная, але толькі пасля яе заканчэння можна будзе з упэўненасцю сказаць, што скляпенні катэдры не абрынуцца.
Пажар на даху святыні ў красавіку мінулага года знішчыў шпіль, гадзіннік і большую частку драўляных крокваў.
Цалкам аднавіць выдатны помнік сакральнай архітэктуры плануецца да 2024 года. Штопраўда, працы ўжо не раз прыпыняліся: з-за забруджання пляцоўкі свінцом, дрэннага надвор’я, а ў сярэдзіне сакавіка — таксама з-за ўведзенага на фоне распаўсюджвання пандэміі каранавірусу нацыянальнага каранціну.
