Каталіцкія біскупы Іспаніі прапанавалі ва ўсіх дыяцэзіях краіны правесці агульнанацыянальны дзень памяці ахвяраў эпідэміі каранавірусу, а таксама тых, хто змагаўся з яе распаўюджваннем.
Пра гэта паведамляе Каталіцкае інфармацыйнае агенцтва КАІ.
Епіскапат краіны лічыць мэтазгодным правесці гэты дзень 25 ліпеня, калі адзначаецца ўспамін святога Якуба, апекуна Іспаніі, або 26 ліпеня, ва ўспамін святога Яўхіма і святой Ганны, бацькоў Найсвяцейшай Панны Марыі, якіх іспанскія католікі ўшаноўваюць як апекуноў пажылых людзей.
Між тым з аўторка ў Іспаніі праходзіць нацыянальная жалоба па шматлікіх ахвярах каранавірусу ў краіне. Яна будзе працягвацца дзесяць дзён, да 4 чэрвеня. На знак жалобы былі прыспушчаныя дзяржаўныя сцягі на больш як 14 тыс. афіцыйных будынкаў і на амаль 140 судах іспанскага вайсковага флоту.
Паводле афіцыйных лічбаў, эпідэмія каранавірусу ў Іспаніі забрала жыццё ў 26 тыс. 834 падданых каралеўства. Аднак гэтыя лічбы некаторыя незалежныя назіральнікі называюць заніжанымі. СМІ зазначаюць, што пасля апошніх паправак, зробленых міністэрствам аховы здароўя, дакладная лічба ахвяраў эпідэміі невядомая. З нядзелі на панядзелак ведамства панізіла лічбу смяротных выпадкаў на 1918.
