Міністр па пытаннях роўнасці Вялікабрытаніі Ліз Трус адзначыла, што яе ўрад можа прыняць пастанову, мэта якой — абарона дзяцей і падлеткаў ад рашэнняў, якія маюць незваротныя наступствы, напрыклад, змена полу.
Як паведамляе Каталіцкае інфармацыйнае агенцтва КАІ, міністр сказала, што ўрадавая рэформа брытанскага закону, які дазваляе асобам з парушэннямі гендарнай ідэнтычнасці змяняць юрыдычны пол, будзе праведзена ўжо гэтым летам.
«Веру, што дарослыя павінны мець свабоду весці сваё жыццё так, як лічаць патрэбным, але мяркую, што ў час, калі яшчэ выхоўваюцца здольнасці чалавека вырашаць, трэба аберагаць яго перад прыняццем незваротных рашэнняў, пра якія ён потым можа шкадаваць», — дадала яна.
Брытанскія пралайф-арганізацыі з задавальненнем прынялі словы прадстаўніцы ўраду.
«Гэта знак змены ў бок здаровага розуму і адыход ад скрайнасці і фанатызму кабінета Тэрэзы Мэй», — сказаў доктар Том Роджэрс, брытанскі пралайф-дзеяч, кіраўнік па справах адукацыі ў Таварыстве абароны ненароджаных дзяцей.
Ён дадаў, аднак, што змены павінны ісці далей. «Трэба аберагаць моладзь таксама перад шкоднай прапаганай ЛГБТ, якой апякуецца ўрад», — адзначыў Роджэрс і заклікаў вярнуць бацькам права вырашаць, ці будуць іх дзеці ўдзельнічаць у абавязковых сёння ўроках сексуальнай адукацыі, насычаных «экстрэмізмам ЛГБТ», які ў многіх школах «прасякнуў амаль усю праграму навучання».
На думку Роджэрса, закон павінен таксама лепш абараняць дарослых.
«Многія людзі шкадуюць пра рашэнні, якія яны прынялі пад уплывам прапаганды і якія выклікалі незваротныя змены ў іх целах.
У выпадку асобаў з псіхалагічнымі праблемамі, якія датычаць іх сексуальнай ідэнтычнасці, трэба перш за ўсё рабіць націск на дапамогу такім людзям вярнуцца да поўнага ўспрыняцця біялагічнага полу», — кажа ён.
