У Італіі, якая моцна церпіць ад пандэміі каранавірусу, ахвярамі інфекцыі сталі не менш за 50 каталіцкіх святароў.
Многія з іх заразіліся, жадаючы прыйсці на дапамогу патрабуючым. Як паведаміў сайт штодзённага інфармацыйнага выдання Corriere della Sera, за пятніцу і суботу 20–21 сакавіка ў краіне адышлі ў вечнасць дзесяць духоўных асобаў.
У Італіі шмат святароў імкнуцца адказаць на заклік Папы Францішка і дапамагчы сваім бліжнім у гэты цяжкі час.
Пераважная большасць з тых, хто заразіўся і памёр, належала да «групы рызыкі» з-за пажылога ўзросту, хоць ахвярамі эпідэміі сталі і некалькі маладзейшых святароў. Так, у Пармскай дыяцэзіі ад каранавірусу памёр 55-гадовы святар, які, верагодна, заразіўся ад пажылой жанчыны, якой апекаваўся.
Самаму старэйшаму святару, які стаў ахвярай эпідэміі ў Італіі, было 104 гады, а самаму маладому — 45.
Найбольш ахвяраў каранавіруснай інфекцыі сярод духавенства Бергамскай дыяцэзіі ў Ламбардыі — рэгіёне, найбольш пацярпелым ад эпідэміі.
