Пандэмія каранавірусу, што лютуе ў свеце, паспрыяла актывізацыі малітвы ў віртуальнай прасторы. Цяпер можна штодзённа ўдзельнічаць у святой Імшы і ружанцовай малітве, якія транслююцца анлайн з санктуарыя Маці Божай у Фаціме.
Далучыцца да малітвы можна на Інтэрнэт-старонцы санктуарыя.
У самім жа санктуарыі цяпер набажэнствы праходзяць толькі для вельмі абмежаванага кола супрацоўнікаў сусветна вядомага месца культу, звязанага са славутымі аб’яўленнямі Маці Божай.
Як паведамляе Каталіцкае інфармацыйнае агенцтва КАІ, гэта звязана з тым, што з-за пандэміі каранавірусу партугальскі ўрад забараніў правядзенне мерапрыемстваў з колькасцю ўдзельнікаў больш за 100.
Канферэнцыя біскупаў Партугаліі акрамя часовага ўстрымання ад цэлебрацыі святых Імшаў з народам разаслала па дыяцэзіях распараджэнне адносна арганізацыі пахаванняў. Паводле рашэння епіскапату, у пахавальных абрадах могуць удзельнічаць толькі самыя блізкія родныя спачылага.
У нядзелю ў большасці партугальскіх касцёлаў цэлебраваліся святыя Імшы з народам, але ў іх удзельнічала вельмі мала вернікаў. Многія дыяцэзіяльныя біскупы далі вернікам дыспенсу ад абавязку ўдзельнічаць у нядзельнай святой Імшы.
У панядзелак у Партугаліі быў зафіксаваны першы выпадак смерці ад каранавірусу. Усяго ім інфіцыявана каля 450 жыхароў гэтай краіны.
