Ганконгская дыяцэзія абвясціла аб шэрагу мер, у тым ліку аб часовым прыпыненні масавых мерапрыемстваў, што павінна дапамагчы спыніць распаўсюджванне новага каранавірусу.
Дыяцэзія абвясціла аб прыпыненні публічных Імшаў па нядзелях і буднях з 15 па 28 лютага, а таксама адмяніла літургію ў Папяльцовую сераду на пачатак Вялікага посту.
Кардынал Джон Тонг, Апостальскі Адміністратар Ганконга, назваў гэтыя меры «сумнымі, але неабходнымі». Рашэнне было прынята з-за таго, што, па прагнозах медыкаў, наступныя два тыдні будуць вырашальным перыядам для падаўлення эпідэміі.
Вызваляючы вернікаў ад абавязку наведваць нядзельную Эўхарыстыю, Ганконгская дыяцэзія дае магчымасць узяць удзел у Імшы праз прамую трансляцыю.
Гэта дае магчымасць людзям усё ж удзельнічаць і атрымліваць cвятую Камунію духоўна, а не фізічна.
Ганконг паведаміў аб 50-і пацверджаных выпадках захворвання і адной смерці. Сотні людзей цяпер ізаляваныя або знаходзяцца пад наглядам.
Касцёлы, аднак, застануцца адкрытымі для ўсіх жадаючых маліцца самастойна.
У касцёле будзе таксама магчымасць паўдзельнічаць у асабістай эўхарыстычнай адарацыі з 10 да 14 гадзін. Аб гэтым паведаміў французскі місіянер айцец Нікаля дэ Франквіль, які ў цяперашні час кіруе ганконгскай парафіяй.
Айцец Нікаля таксама выказаў спадзяванне на тое, што гэты цяжкі час дасць хрысціянам і іншым людзям магчымасць праявіць вялікую салідарнасць, запаволіць сваё жыццё і праводзіць больш часу са сваімі сем’ямі, а таксама мець больш часу для малітвы, каб паразважаць пра сэнс свайго жыцця.
