Пасля таго, як 30 студзеня апеляцыйны суд у Францыі зняў абвінавачванне з арцыбіскупа Ліёнскага кардынала Філіпа Барбарэна, іерарх даў першае за апошнія тры гады інтэрв’ю, у якім прызнаў сваю памылку.
«Як грамадзянін я быў рэабілітаваны, але ў грамадскім меркаванні назаўжды застануся як той, хто па справядлівасці не інфармаваў пра тыя жудасныя злачынствы, а магчыма, нават як той, хто іх затушоўваў», — цытуе французскага кардынала польская рэдакцыя парталу Vatican News.
Суд першай інстанцыі прызнаў Філіпа Барбарэна вінаватым у неданясенні аб сексуальным выкарыстанні непаўнагадовых, учыненым у мінулым адным са святароў Ліёнскай архідыяцэзіі. Іерарх не згадзіўся з абвінавачваннем і падаў апеляцыю. Суд вышэйшай інстанцыі адмяніў прысуд і прызнаў іерарха невінаватым.
Кардынал Барбарэн прызнаўся, што за гэтыя гады шмат перажыў і лепш зразумеў, што давялося выцерпець ахвярам выкарыстанняў.
Ён выказаў упэўненасць у тым, што як яго справа, так і ўсе выяўленыя выпадкі выкарыстання ў Касцёле прывялі да абуджэння ў Францыі паўсюднай свядомасці і дапамогуць выкараніць гэтае зло ў іншых сектарах грамадства. Іерарх падкрэсліў, што праблемы, з якімі ён сутыкнуўся ў мінулыя гады, нішто ў параўнанні з цярпеннямі, якія на працягу доўгіх гадоў зносілі ахвяры.
Разам з тым кардынал падкрэсліў, што ён асабіста ніколі нічога не затушоўваў. Калі яму як Ліёнскаму арцыбіскупу станавілася вядома пра выпадкі выкарыстання, ён заўжды рэагаваў у адпаведнасці з працэдурамі.
У справе, за якую яго судзілі, іерарх прызнае сваю памылку.
Гаворка ідзе пра выпадкі, якія мелі месца больш за 20 гадоў таму, у сувязі з чым мінуў тэрмін іх даўніны паводле французскага заканадаўства. Кардынал Філіп Барбарэн памылкова палічыў, што справа была ўрэгулявана яго папярэднікамі, а ён сам задаволіўся запэўненнем у тым, што з таго часу той святар больш не парушаў закон.
«Мне не хапіла адвагі і рашучасці», — прызнае французскі кардынал.
