Папа Францішак вырашыў, што і пасля дасягнення 75-гадовага ўзросту аўстрыйскі кардынал Крыстаф Шонбарн застанецца арцыбіскупам Венскім, пра што юбіляру паведамілі з Ватыкана 21 студеня, напярэдадні яго 75-а дня нараджэння.
Як са спасылкай на інфармацыйную службу Венскай архідыяцэзіі перадало Каталіцкае інфармацыйнае агенцтва КАІ, гэтае рашэнне Папы не датычыцца старшынства кардынала Шонбарна ў Канферэнцыі біскупаў Аўстрыі, якой ён кіруе з 1998 года. Хоць фармальна іерарх можа пакінуць гэтую пасаду ў 2022 годзе, аднак ён плануе падаць просьбу аб вызваленні на бліжэйшым пасяджэнні аўстрыйскага епіскапату, запланаваным на сакавік.
У адпаведнасці з Кодэксам кананічнага права, пры дасягненні 75-гадовага ўзросту біскупы Каталіцкага Касцёла абавязаны звярнуцца да Папы з просьбай аб вызваленні ад займаных пасадаў. Кардынал Шонбарн падаў такую просьбу Святому Айцу яшчэ ў кастрычніку, калі ў Рыме браў удзел у Спецыяльным сходзе Сіноду Біскупаў па Панамазонскім рэгіёне.
Як сказана ў спецыяльным паведамленні Венскай архідыяцэзіі, рашэнне Папы, які пажадаў пакінуць Венскага арцыбіскупа на яго пасадзе, «на практыцы азначае дадатковы час на спакойны працяг пошукаў яго магчымага наступніка». У дакуменце паведамляецца, што кардынал Шонбарн пакіне сваю пасаду з моманту прызначэння яго наступніка.
Працэс пошуку наступніка кардынала Крыстафа Шонбарна на пасадзе Венскага арцыбіскупа будзе праходзіць пад кіраўніцтвам Прэфекта Кангрэгацыі па справах Біскупаў кардынала Марка Уэлле пры дапамозе Апостальскага нунцыя ў Вене арцыбіскупа Пэдро Лопэса Кінтаны, які рыхтуе спіс магчымых кандыдатаў. Яго разгледзіць Кангрэгацыя па справах Біскупаў, пасля чаго прадставіць выбранага кандыдата на зацвярджэнне Святому Айцу. Канчатковае рашэнне ў гэтай справе прыме асабіста Папа Францішак.
Ужо менш за год застаецца да дасягнення 75-гадовага ўзросту Мітрапалітам Мінска-Магілёўскім арцыбіскупам Тадэвушам Кандрусевічам. Як успрымае магчымасць свайго выхаду на пенсію беларускі іерарх, ён адказаў на сустрэчы з журналістамі перад святамі Божага Наарджэння.
