Ватыканская лёгкаатлетычная каманда Athletica Vaticana узяла ўдзел у забегу Wittenberger Nachtlauf, які прайшоў у Вітэнбергу — нямецкім горадзе, з якога пачаў сваю пропаведзь Марцін Лютэр.
Як паведамляе беларуская рэдакцыя парталу Vatican News, 20 членаў каманды Athletica Vaticana прыбылі ў зямлю Саксонію-Анхальт па запрашэнні сваіх пратэстанцкіх калег, якія ў мінулым годзе гасцілі ў Ватыкане з нагоды паўмарафону Рым – Остыя.
Забег адбыўся 11 мая. Гэта быў першы ўдзел ватыканскіх атлетаў у спартовых спаборніцтвах за межамі Італіі. У склад каманды ўваходзяць служачыя ватыканскіх установаў, сярод якіх дзве асобы з абмежаванымі магчымасцямі: Сара Варгета, якая змагаецца з цяжкой нейрадэгенератыўнай хваробай, і Джанлука Палацы, прыкаваны да інваліднага вазка.
Удзел Athletica Vaticana у спаборніцтвах, якія праходзілі ў горадзе, які з’яўляецца «калыскай Рэфармацыі», прадэманстраваў, што з дапамогай спорту магчыма будаваць масты паміж людзьмі розных канфесій.
