27 кастрычніка па дарозе на апошнюю сесію Сіноду Біскупаў адбылася кароткая размова паміж Святым Айцом і арцыбіскупам Тадэвушам Кандрусевічам.
Арцыбіскуп Мітрапаліт Мінска-Магілёўскі, які прадстаўляе Касцёл у Беларусі на высокім форуме, зноў выпадкова сустрэўся па дарозе на пасяджэнне з папам Францішкам. Паміж Святым Айцом і беларускім іерархам адбылася кароткая размова.
Першай закранутай у ёй тэмай стаў Сінод Біскупаў, прысвечаны моладзі.
Суразмоўцы адзначылі, што моладзь прыўнесла ў яго новы дух і што дзякуючы ёй форум стаў больш дынамічным.
Карыстаючыся магчымасцю, арцыбіскуп Кандрусевіч пацікавіўся ў Святога Айца, калі той наведае Беларусь. Папа Францішак не выключыў магчымасць такога візіту, сказаўшы ў адказ:
«Так, мяне запрашае прэзідэнт».
Сам Пантыфік, у сваю чаргу, выказаў заклапочанасць у сувязі з тым, што адбылося ў адносінах паміж Канстанцінопальскім і Маскоўскім патрырхатамі Праваслаўнай Царквы, і спытаўся ў арцыбіскупа Кандрусевіча, ці не ўплывае гэта на становішча Каталіцкага Касцёла ў Беларусі.
«Узніклы канфлікт не адбіваецца на нашых узаемаадносінах, якія адрозніваюцца ўзаемапавагай і ўзаемаразуменнем», — адказаў кіраўнік каталіцкага епіскапату ў Беларусі пастыру паўсюднага Касцёла.
