21 жніўня, напярэдадні свайго Апостальскага падарожжа ў Ірландыю, папа Францішак запісаў кароткае відэапасланне, у якім звяртае ўвагу на важнасць падрыхтоўкі моладзі да будучыні.
Святы Айцец выказвае пажаданне, каб Сусветная сустрэча сем’яў, якая распачалася ў гэты дзень у Дубліне (Ірландыя), стала для іх заахвочваннем і нагадала пра «асноватворную ролю сем’яў у жыцці грамадства і ў будаўніцтве лепшай будучыні для моладзі».
«Моладзь — гэта будучыня! Вельмі важна падрыхтаваць моладзь для будучыні, падрыхтаваць сёння, у цяперашні час, але на каранях мінулага: моладзь і дзядулі, бабулі. Гэта вельмі важна», — падкрэсліў Пантыфік.
ІХ Сусветная сустрэча сем’яў з’яўляецца, такім чынам, нагодаю для таго, каб сустрэцца і падтрымаць адзно аднаго ў жыцці сваім пакліканнем. Папа ведае, што, сапраўды, «сёння сем’і сутыкаюцца з мноствам выклікаў у сваіх намаганнях увасабляць верную любоў, гадаваць дзяцей на здаровых каштоўнасцях і каб быць у як мага большай еднасці, што з’яўляецца закваскаю дабрыні, любові і ўзаемапавагі».
Папа Францішак жадае абняць усіх ірландцаў, выказваючы пажаданне, каб умацоўвалася «адзінства і паяднанне паміж усімі Хрыстовымі вернымі як знак трывалага супакою, што з’яўляецца Божаю мараю для ўсёй чалавечай сям’і».
Святы Айцец наведае Ірландыю 25–26 жніўня, дзе правядзе шэраг цэлебрацый і сустрэчаў у межах ІХ Сусветнай сустрэчы сем’яў.
