У катэхезе падчас агульнай аўдыенцыі, якая 20 чэрвеня прайшла ў Ватыкане, Святы Айцец заклікаў вернікаў прымаць Божыя запаведзі у духу сыноў, а не так, як гэта робяць нявольнікі.
Працягваючы цыкл катэхезаў, прысвечаны Божым запаведзям, папа Францішак заўважыў, што ў Бібліі яны называюцца проста «словамі», якія Бог скіраваў да свайго народа. Адсюль паходзіць тэрмін Дэкалог, які даслоўна азначае «Дзесяць словаў».
«Якая розніца існуе паміж загадам і словам?
Загад — гэта зварот, які не прадугледжвае дыялогу. Слова ж, наадварот, з’яўляецца важным сродкам для такіх адносінаў як дыялог.
Бог Айцец стварае праз сваё слова, а Яго Сын з’яўляецца Словам, якое сталася целам. Любоў жывіцца словамі, падобна як выхаванне і супрацоўніцтва. Дзве асобы, якія не любяць адно аднаго, не здольныя да камунікацыі. Калі нехта прамаўляе да нашага сэрца, знікае наша самота», — сказаў Папа і дадаў, што праз свае Дзесяць запаведзяў Бог пачынае камунікацыю з чалавекам і чакае ад яго адказу.
Пантыфік заўважыў, што атрымліваць загады — гэта адно, а разумець, што хтосьці імкнецца ўвайсці з намі ў камунікацыю — зусім іншае.
Божыя запаведзі — гэта і ёсць дыялог Бога з чалавекам, а д’ябал на самым пачатку гісторыі імкнуўся пераканаць мужчыну і жанчыну ў адваротным, кажучы, што Бог забараніў ім есць плады з дрэва дабра і зла, каб трымаць іх у падпарадкаванні.
«Выклік заключаецца ў наступным. Першае прадпісанне, якое Бог даў чалавеку, што гэта: наказ дэспата, які забараняе і прымушае, або праява клопату бацькі, які турбуецца пра сваіх дзяцей і бароніць іх ад самазнішчэння? Гэта слова ці загад?
Самая трагічная з розных няпраўдаў, якія змей сказаў Еве, гэта ўнушэнне пра зайздроснага Бога.
Маўляў: „Бог зайздросціць вам. Ён раўнівы. Бог не жадае, каб вы былі свабоднымі“. Факты драматычным чынам пацвярджаюць, што змей падмануў, прымусіў верыць у тое, што слова любові з’яўляецца загадам», — адзначыў пастыр паўсюднага Касцёла.
Пры гэтым ён заўважыў, што чалавек заўсёды стаіць перад дылемай: Бог мне навязвае штосьці ці клапоціцца пра мяне? Ці Ягоныя запаведзі гэта толькі закон, ці слова Айца, які жадае абараніць ад зла?
«Гэтая барацьба ўнутры і звонку нас адбываецца пастаянна: тысячы разоў мы павінны выбіраць паміж нявольніцкай ментальнасцю і сыноўскай», — дадаў Папа.
«Святы Дух — гэта Дух сыноў, гэта Дух Езуса. Дух нявольнікаў можа ўспрымаць закон толькі як прыгнёт і можа прывесці да двух супрацьлеглых вынікаў: або да жыцця, якое складаецца з абавязкаў і прымусу, або да гвалтоўнай рэакцыі адмаўлення.
Усё хрысціянства –—гэта пераход ад літары Закона да Духа, які дае жыццё. Езус — гэта Слова Айца, а не прысуд Айца. Езус прыйшоў, каб збавіць праз сваё слова, а не асудзіць нас»,
— сцвердзіў Пантыфік.
Падагульняючы, Святы Айцец заўважыў, што па чалавеку адразу відаць, калі ён здзейсніў пераход ад літары Закона да Духа. Відаць, ці ён думае як сын ці як нявольнік.
«Запаведзі — гэта шлях да свабоды, бо яны з’яўляюцца словам Айца, які робіць нас свабоднымі на гэтым шляху.
Свет патрабуе не законніцтва, а клопату. Ён мае патрэбу ў хрысціянах з сэрцамі сыноў», — падкрэсліў папа Францішак на заканчэнне сваёй катэхезы.
