Паколькі ў сувязі са складанай эпідэміялагічнай сітуацыяй у многіх парафіях былі спынены заняткі па рэлігіі, яны працягваюцца анлайн з дапамогаю відэакатэхез на партале Catholic.by.
Дарагія маладыя сябры!
Месяц таму катэхетычная секцыя, якая дзейнічае пры Камісіі па справах каталіцкай адукацыі і катэхезы пры Канферэнцыі Каталіцкіх Біскупаў у Беларусі, арганізавала цыкл відэакатэхез. Першай тэмай гэтых катэхез былі «Сем сакрамэнтаў Касцёла», якія суправаджаюць хрысціяніна ад моманту яго нараджэння да смерці і з’яўляюцца прыладамі ласкі, устаноўленымі Езусам Хрыстом для нашага збаўлення, інакш кажучы — бачнымі знакамі нябачнай ласкі.
Прапаную вашай увазе другую тэму відэакатэхез: «Дзесяць Божых запаведзяў».
Папа Францішак у сваіх катэхезах падчас агульных аўдыенцый у Ватыкане адзначае, што погляд на Дэкалог прыводзіць да разважанняў пра Езуса Хрыста:
«Разглядаючы жыццё, апісанае Дэкалогам, гэта значыць жыццё ўдзячнае, свабоднае, сапраўднае, благаслаўляючае, сталае, ахоўваючае і любячае жыццё, вернае, шчодрае і праўдзівае, амаль не заўважаючы гэтага, мы знаходзімся перад абліччам Хрыста.
Дэкалог — гэта Яго „рэнтгенаўскі фотаздымакu, які характарызуе Яго, як фатаграфічны негатыў, і дазваляе, каб праявілася Яго аблічча — як на Святой Плашчаніцы».
Ужо цяпер жадаю ад імя ўсіх нас падзякаваць катэхетам, якія будуць праводзіць відэазаняткі, і запрашаю да плённага карыстання відэакатэхезамі на ютубе.
З пастырскім благаслаўленнем,
+ Аляксандр Яшэўскі SDB
Старшыня Камісіі па справах каталіцкай адукацыі і катэхезы
пры Канферэнцыі Каталіцкіх Біскупаў у Беларусі
