6 сакавіка споўнілася 80 гадоў старшыні Папскай рады па інтэрпрэтацыі заканадаўчых тэкстаў — кардыналу Франчэско Кокапальмерыа. Пасля дасягнення 80-гадовага ўзросту кардыналы губляюць права ўдзельнічаць у магчымым канклаве.
Такім чынам колькасць кардыналаў-выбаршчыкаў зменшылася да 117.
Франчэско Кокапальмерыа нарадзіўся 6 сакавіка 1938 г. у Сан-Джуліяна-Міланэзэ, недалёка ад Мілана. Прэзбітэрскае пасвячэнне атрымаў 28 чэрвеня 1962 г. З’яўляецца доктарам тэалогіі і права, аўтарам шматлікіх навуковых публікацый.
8 красавіка 1993 г. Ян Павел II прызначыў яго дапаможным біскупам Міланскай архідыяцэзіі, а 15 лютага 2007 г. папа Бэнэдыкт XVI — старшынёй Папскай рады заканадаўчых тэкстаў, задача якой — інтэрпрэтаваць агульнае права Каталіцкага Касцёла, дапамагаючы іншым дыкастэрыям Рымскай курыі ў рэдагаванні дакументаў, якія выдаюцца імі.
Таксама па просьбе біскупскіх канферэнцый узгаданая дыкастэрыя даследуе адпаведнасць дакументаў, выдадзеных імі, з дзеючым заканадаўствам.
У Калегію кардыналаў іерарха ўключыў папа Бэнэдыкт XVI 18 лютага 2012 г. Кардынал Кокапальмерыа неаднаразова падкрэсліваў законнасць рэформ, якія здзяйсняе папа Францішак.
Да 6 чэрвеня 80 гадоў споўніцца яшчэ тром кардыналам: італьянцу Анджэло Амата, партугальцу Мануэлю Мантэйра дэ Кастра і в’етнамцу П’еру Нгуэн Ван Нону. Такім чынам, ужо летам колькасць кардыналаў-выбаршчыкаў зменшыцца да 114.
