14 студзеня адзначаецца Сусветны дзень мігрантаў і бежанцаў. Сёлета папа Францішак у сваім пасланні на гэты дзень засяродзіўся на неабходнасці «прымаць, ахоўваць, развіваць і інтэграваць мігрантаў і бежанцаў».
Гуманітарныя візы, аб’яднанне сем’яў, годнае першае ўладкаванне, свабода перамяшчэння: Папа прапануе чатыры «дзеянні» ў гэтым кірунку.
Прапанаваныя ім захады скіраваны перадусім на тое, каб вырашаць праблемы мігрантаў і бежанцаў з павагай да годнасці асобы. Пасланне Святога Айца багатае на канкрэтныя прапановы, якія ён падае для абмеркавання і вывучэння хрысціянам і міжнароднай супольнасці.
Прымаць
Для папы Францішка гэта «перадусім даць мігрантам і бежанцам бяспечную і законную магчымасць уехаць у краіны прызначэння». Гэта — «так» гуманітарным візам, аб’яднанню сем’яў, стварэнню гуманітарных калідораў, падрыхтоўцы персаналу памежных службаў, каб ён дзейнічаў з павагай да чалавечай годнасці.
Ахоўваць іх шлях
Папа патрабуе прызнання і пашаны да «здольнасцяў і кампетэнтнасці мігрантаў, якія просяць прытулку, і бежанцаў», якія з’яўляюцца «сапраўдным багаццем для супольнасцяў, што іх прымаюць». А для непаўналетніх Святы Айцец просіць, каб у духу павагі да паўсюднага права нацыянальная прыналежнасць «прызнавалася і адпаведным чынам дакументальна пацвярджалася для ўсіх дзяцей — хлопчыкаў і дзяўчынак — у момант нараджэння».
Развіваць годнасць асобы
Папа заклікае прымаючую супольнасць «ствараць для гэтых людзей умовы, спрыяльныя для развіцця асобы ва ўсіх яе вымярэннях», у тым ліку і рэлігійным.
Інтэграваць, або выходзіць насустрач
Папа Францішак лічыць, што неабходна быць адкрытымі для большага ўзаемапазнання, каб прымаць каштоўнасці, якія нясе ў сабе кожная культура.
У нядзелю ў ватыканскай базыліцы святога Пятра Святы Айцец узначаліць святую Імшу, у якой будзе маліцца за мігрантаў і бежанцаў, а таксама за тых, хто іх прымае і дапамагае ва ўладкаванні на новым месцы.
