Святы Айцец выказаў свае спачуванні ў сувязі з дарожным здарэннем у Перу, дзе ў выніку падзення аўтобуса з абрыва загінулі 48 чалавек. У спецыяльнай тэлеграме гаворыцца, што Пантыфік быў «глыбока засмучаны» весткай аб трагедыі і моліцца аб вечным супакоі для загінулых.
«Прашу, каб былі перададзены шчырыя спачуванні Святога Айца, разам з выразам суцяшэння для членаў сем’яў, якія аплакваюць гэтую вялікую страту, а таксама яго духоўная блізкасць да параненых», — гаворыцца ў тэлеграме, скіраванай за подпісам Дзяржаўнага Сакратара Ватыкана кардынала П’етро Параліна.
Здарэнне адбылося 2 студзеня ў раёне Пасамаё, на поўначы ад сталіцы Перу горада Ліма, на небяспечным кавалку горнай дарогі. Аўтобус накіроўваўся ў Ліму з Гуача, прыкладна ў 130 км ад сталіцы. Паводле папярэдніх дадзеных, ён сутыкнуўся з іншым транспартным сродкам і ўпаў са 100-метровага абрыва. З 54 пасажыраў выжылі толькі шэсць. З траўмамі рознай цяжкасці яны знаходзяцца ў бальніцы.
Святы Айцец здзейсніць візіт у Перу 18-21 студзеня. У рамках Апостальскага падарожжа Пантыфік наведае чатыры гарады: Ліму, Пуэрта-Мальданада і Трухільё. Перад гэтым, 15-18 студзеня, Святы Айцец наведае Чылі. Гэта будзе ўжо шосты візіт папы Францішка ў Лацінскую Амерыку падчас яго пантыфікату.
