«Молячыся, мы можам клапаціцца адно пра аднаго. Малітва ачышчае і ўмацоўвае нас. Яна асвятляе наш шлях і дазваляе нам рухацца наперад. Малітва — гэта паліва на нашым шляху да адзінства», — такія думкі выказаў папа Францішак 7 снежня ў Ватыкане падчас сустрэчы з прадстаўнікамі Сусветнай лютэранскай арганізацыі.
«Любоў да Пана, якую мы адчуваем у малітве, прыводзіць у рух міласэрнасць, што збліжае нас — гэта матыў нашых намаганняў да еднасці і сіла, якая дазваляе нам ісці наперад разам», — падкрэсліў Папа.
Пантыфік узгадаў думкі з энцыклікі св. Яна Паўла ІІ Ut unum sint, якія кажуць, што малітва — гэта душа экуменічнага абнаўлення і імкнення да адзінства. «Молячыся, мы можам глядзець адно на аднаго “ў правільным ракурсе” — Божым», — заўважыў Святы Айцец.
І такое бачанне братэрства, паводле Пантыфіка, павінна быць адпраўным пунктам для экуменізму. Гэта дапаможа адмовіцца ад старых прадузятасцяў, у тым ліку звязаных са справай Марціна Лютэра.
Ужо шмат зроблена ў гэтай справе на шляху дыялогу паміж Сусветнай лютэранскай федэрацыяй і Папскай радай спрыяння хрысціянскаму адзінству, распачатымі ў 1967 г. Паводле Святога Айца, дзякуючы «ачышчанай памяці» сёння можна з упэўненасцю глядзець у будучыню, цэнячы адрозненні, якія існуюць у розных канфесійных традыцыях. У далейшым ніколі нельга разглядаць сябе ў якасці супернікаў.
Для таго, каб ісці далей па экуменічным шляху разам, недастаткова выдатных ідэй; існуе неабходнасць у канкрэтных кроках. Тут Папа назваў дабрачыннасць і дапамогу бедным, а таксама супольнае абвяшчэнне Евангелля.
Сусветная лютэранская федэрацыя — найбуйнейшае глабальнае аб’яднанне нацыянальных і рэгіянальных Лютэранскіх Цэркваў, якое прадстаўляе каля 70 мільёнаў вернікаў.
