9 кастрычніка ў Ватыкане прайшла сустрэча главаў Усходніх Каталіцкіх Цэркваў са Святым Айцом Францішкам. Вярхоўны арцыбіскуп Украінскай Грэка-Каталіцкай Царквы Святаслаў Шаўчук падзякаваў Пантыфіку за падтрымку ўкраінскага народа і зноў запрасіў наведаць Украіну.
«Я хачу падзякаваць Вам, Ваша Святасць, за падтрымку і дапамогу Украіне. Нас наведалі два Вашыя пасланнікі: напачатку кардынал П’етро Паралін, Дзяржсакратар Ватыкана, а ў гэтым годзе — кардынал Леанарда Сандры, прэфект Кангрэгацыі па справах Усходніх Касцёлаў. Цяпер, Святы Айцец, дзеці чакаюць візіту свайго бацькі», — сказаў вярхоўны іерарх.
Глава УГКЦ адзначыў, што Мінскія дамоўленасці не функцыянуюць, і палітыкі сёння не ведаюць, як спыніць вайну ва Украіне, аднак «наш народ верыць, што Ваш візіт, як пасланніка міру, можа спыніць вайну».
Папа Францішак запэўніў арцыбіскупа Святаслава ў сваёй падтрымцы Украіны і сказаў: «Перад абразом, які Вы мне некалі падарылі ў Аргенціне, я штодзень запальваю свечку за мір ва Украіне і малюся аб спыненні вайны».
Сустрэча главаў Усходніх Каталіцкіх Цэркваў са Святым Айцом праходзіла ў межах Пленарнай асамблеі Кангрэгацыі па справах Усходніх Касцёлаў, якая трывае ў Ватыкане з 9 па 12 кастрычніка.
