Кансультант Кангрэгацыі Божага Культу і Дысцыпліны Сакрамэнтаў кс. Клаўдыё Маньёлі ў інтэрв’ю Ватыканскаму радыё пракаментаваў цыркулярны ліст «Пра хлеб і віно для Эўхарыстыі».
Святар заўважыў, што ліст, падрыхтаваны Кангрэгацыяй па даручэнні папы Францішка, патрабуе ўвагі і пільнасці ад біскупаў.
Італьянскі літургіст звярнуў увагу на тое, што ва Усходніх Касцёлах, хоць і няма патрабавання ўжываць прэсны хлеб, але гэта заўсёды павінен быць сапраўдны пшанічны хлеб.
«Калі адсутнічаюць гэтыя элементы — хлеб не зрозблены з пшаніцы, а віно з вінаграду — можна сказаць з упэўненасцю, што Эўхарыстыя не здзяйсняецца. Яна — несапраўдная, бо не адпавядае таму, што ўстанавіў Хрыстус», — падкрэсліў святар.
Літургіст патлумачыў, што існуюць злоўжыванні, выкліканыя свайго роду «тэалогіяй інкультурацыі», згодна з якой Езус выбраў хлеб і віно проста як элементы міжземнаморскай культуры, да якой належаў. Паводле слоў Маньёлі, некаторыя тэолагі і пастаралісты прапаноўвалі выкарыстоўваць на розных кантынентах замест віна напоі, характэрныя для той культуры, а замест пшаніцы — іншыя зернавыя.
«Выходзячы за межы тэорыі, некаторыя пачалі на практыцы прымяняць такі падыход, ідучы насуперак правілу Касцёла, які ў гэтым пытанні заўсёды быў цвёрда перакананы і нязменны», — патлумачыў эксперт матывы выдання ліста Кангрэгацыі Божага Культу і Дысцыпліны Сакрамэнтаў.
