Леў XIV завяршыў візіт у Алжыр і накіраваўся ў Камерун. Там Пантыфік правядзе амаль 70 гадзін, наведваючы нават зоны ваеннага канфлікту.
Маршрут паміж Алжырам, дзе Святы Айцец знаходзіўся з 13 красавіка, і Яундэ склаў 4014 кіламетраў. Гэтую адлегласць Пантыфік пераадолеў на самалёце «A330-900neo» італьянскай кампаніі «ITA», прызямліўшыся ў Камеруне ў другой палове дня 15 красавіка.
Гэтая краіна прымае ўжо трэцяга Папу: пасля Яна Паўла II, які быў тут у 1985 і 1995 гадах, і Бэнэдыкта XVI, візіт якога адбыўся ў 2009 годзе.
Да 18 красавіка рэзідэнцыяй Льва XIV будзе апостальская нунцыятура ў сталіцы.
Касцёл Камеруна ў лічбах: сацыяльнае служэнне і моц катэхетызацыі
У Камеруне пражывае больш за 28 мільёнаў чалавек, якія належаць да 200 этнічных груп. Католікі складаюць 38,6 працэнта насельніцтва (каля 8,3 мільёна вернікаў). Касцельная структура налічвае 5 мітраполій і 26 дыяцэзій, дзе служаць 35 біскупаў, 2388 дыяцэзіяльных і 912 законных святароў. Асаблівую сілу мясцовага Касцёла складаюць 26328 катэхетаў. Сярэдняя нагрузка на аднаго душпастыра складае 2516 вернікаў.
Касцёл адыгрывае ключавую ролю ў сацыяльнай сферы краіны. Пад яго кіраўніцтвам працуюць 1668 школ і садоў, 276 сярэдніх школ і 34 вышэйшыя навучальныя ўстановы, дзе вучацца больш за 440 тысяч чалавек. Медыцынская сетка ўключае 279 амбулаторый, 59 бальніц, 7 лепразорыяў і 12 цэнтраў для людзей з інваліднасцю. Таксама дзейнічаюць 42 сіроцкія прытулкі і 21 сямейная кансультацыя.
Эканоміка Камеруна з’яўляецца самай магутнай у рэгіёне: яна забяспечвае больш за 40 працэнтаў ВУП Эканамічнай і валютнай супольнасці Цэнтральнай Афрыкі (CEMAC). Нягледзячы на гэтую лідарскую ролю і багацце рэсурсаў (нафта, какава, драўніна), у краіне назіраецца значная няроўнасць. Прагрэсіўныя раёны кантрастуюць з паўночнымі рэгіёнамі Сахеля, дзе насельніцтва сутыкаецца з нізкай ураджайнасцю і абмежаваным доступам да базавых сацыяльных паслуг.
Папа сустрэўся з дзецьмі ў Алжыры: візіт па-за пратаколам
Леў XIV знаходзіўся ў Алжыры з 13 па 15 красавіка. Гэта быў першы ў гісторыі візіт Рымскага Пантыфіка на алжырскую зямлю. Папа сустрэўся з уладамі краіны, мясцовай каталіцкай супольнасцю, наведаў галоўную мячэць і месцы, звязаныя з жыццём і служэннем святога Аўгустына.
Але перш чым пакінуць Алжыр і адправіцца ў Камерун, раніцай 15 красавіка, развітаўшыся з супрацоўнікамі нунцыятуры, Святы Айцец здзейсніў кароткі візіт у дзіцячы садок Маці Божай Афрыканскай, якім кіруюць духоўныя дочкі святой Маці Тэрэзы з Калькуты — Сёстры Місіянеркі Любові. Візіт не быў прадугледжаны афіцыйнай праграмай яго падарожжа.
Зала Друку Апостальскай Сталіцы лаканічна паінфармавала, што дзеці паказалі Папу кароткі спектакль. Затым, перш чым адправіцца ў аэрапорт, Святы Айцец прывітаў іх і законных сясцёр.
Сэрца Афрыкі: пачаўся візіт Папы Льва XIV у Камерун
Леў XIV прыбыў у Камерун, пачынаючы новы этап свайго падарожжа па Афрыцы. У аэрапорце Яўндэ Пантыфіка сустрэлі іерархі Касцёла і высокія прадстаўнікі дзяржаўнай улады.
Пантыфік ступае на зямлю «горада сямі пагоркаў»
Адразу пасля прызямлення каля 15.15 па мясцовым часе пачалася афіцыйная цырымонія прывітання. Апостальскі нунцый у Камеруне і Экватарыяльнай Гвінеі арцыбіскуп Хасэ Авеліна Бетанкур разам з кіраўніком пратакола падняліся на борт, каб павітаць Папу. Ля падножжа трапа Льва XIV сустракаў Прэм’ер-міністр Камеруна Жазэф Дыён Нгутэ. Паводле прыгожай мясцовай традыцыі, двое дзяцей у нацыянальным адзенні уручылі Святому Айцу кветкі, пасля чаго прагучалі дзяржаўныя гімны, адбылося ўшанаванне сцягоў і прадстаўленне дэлегацый.
Асаблівую ролю ў арганізацыі сустрэчы адыграў мясцовы Каталіцкі Касцёл. Нагадаем, што біскупская канферэнцыя Камеруна, якую сёння ўзначальвае арцыбіскуп Баменды Эндру Нкеа Фуанья, каардынуе душпастырскую дзейнасць у 5 касцельных правінцыях і 26 дыяцэзіях.
Прысутнасць Пантыфіка ў Яўндэ, які часта называюць «горадам сямі пагоркаў», стала сапраўдным святам для шматлікай супольнасці вернікаў краіны, чыя гісторыя ўзыходзіць да каланіяльных часоў і здабыцця незалежнасці ў 1960 годзе.
Сустрэча ў Палацы Адзінства падкрэслівае значнасць візіту
Пасля ўрачыстасцей у аэрапорце папскі картэж накіраваўся ў бок афіцыйнай рэзідэнцыі Прэзідэнта Камеруна — Палаца Адзінства, вядомага таксама як Палац Этудзі. Шлях працягласцю больш за 20 кіламетраў пралягаў праз маляўнічыя паўночныя кварталы сталіцы. Гэты архітэктурны комплекс, узведзены на пагорку па праекце франка-туніскага майстра Аліўе-Клемана Какуба, з’яўляецца сімвалам дзяржаўнасці і месцам, дзе адбудуцца першыя важныя перамовы Папы з кіраўніцтвам краіны ў межах яго знаходжання на камерунскай зямлі.
Леў XIV у Яўндэ: сустрэча з прэзідэнтам і грамадствам
Візіт Святога Айца ў Камерун пачаўся з вельмі асабістага і сімвалічнага жэсту. У прэзідэнцкім палацы Папу сустракаў прэзідэнт Рэспублікі Поль Бія разам са сваёй жонкай Шанталь. Гэта сустрэча, якая ўключала прыватную размову і абмен падарункамі, стала важным крокам у наладжванні даверу паміж Апостальскай Сталіцай і кіраўніцтвам краіны.
Пасля завяршэння візіту ветлівасці ў прэзідэнцкую рэзідэнцыю, Пантыфік накіраваўся ў Палац кангрэсаў, што месціцца на маляўнічым узгорку Нколь-Ньяда. Менавіта там была запланавана маштабная сустрэча з прадстаўнікамі ўладаў, грамадзянскай супольнасцю і дыпламатычным корпусам.
У звароце да прадстаўнікоў улады Леў XIV падзякаваў за цёплы прыём і адзначыў унікальнасць Камеруна, які часта называюць «Афрыкай у мініяцюры» па прычыне разнастайнасці зямель, культур, моў і традыцый. Ён падкрэсліў, што разнастайнасць — не праблема, а каштоўны рэсурс для пабудовы братэрства і трывалага міру.
Святы Айцец зазначыў, што прыбыў у краіну як «пастыр і слуга дыялогу, братэрства і міру», каб заахвоціць усіх камерунцаў з энтузіязмам і настойлівасцю працягваць будаўніцтва агульнага дабра. Асаблівы заклік ён жадае скіраваць да моладзі, каб заахвоціць яе актыўна ўдзельнічаць у стварэнні больш справядлівага грамадства.
Яшчэ адна мэта візіту — умацаваць сувязі і супрацоўніцтва паміж Апостальскай Сталіцай і Рэспублікай Камерун на аснове ўзаемнай павагі, годнасці кожнага чалавека і рэлігійнай свабоды.
Святы Айцец падкрэсліў важную ролю грамадзянскіх уладаў краіны. «Правіць – значыць любіць сваю краіну, а таксама суседнія краіны. У міжнародных адносінах таксама дзейнічае запаведзь: любі бліжняга твайго, як самога сябе!» — нагадаў ён.
Ён заахвоціў улады бачыць у грамадзянскай супольнасці жыццёвую сілу нацыянальнай згуртаванасці. Жаночыя і моладзевыя арганізацыі, прафсаюзы, дабрачынныя арганізацыі, традыцыйныя і рэлігійныя лідары адыгрываюць незаменную ролю ў захаванні сацыяльнай згоды. Менавіта яны часта знаходзяцца на першай лініі ўрэгулявання канфліктаў і падтрымкі пацярпелых. Грамадзянская супольнасць таксама спрыяе фарміраванню сумлення, развіццю культуры дыялогу і павазе адрозненняў.
Таксама Папа нагадаў, што сацыяльная справядлівасць адыгрывае значную ролю ў развіцці грамадства. Камерун валодае чалавечымі, культурнымі і духоўнымі рэсурсамі, неабходнымі для пераадолення канфліктаў і дасягнення росквіту. Неабходна ператварыць раны мінулага ў крыніцы абнаўлення. Надзею краіны і Касцёла ўвасабляе моладзь, таму інвестыцыі ў адукацыю і занятасць моладзі з’яўляюцца ключом да доўгатэрміновага міру.
«Гэта адзіны спосаб стрымаць уцечку выдатных талентаў у іншыя рэгіёны планеты. Гэта таксама адзіны спосаб процідзейнічаць язвам наркотыкаў, прастытуцыі і апатыі, якія ўсё часцей руйнуюць маладыя жыцці»,
— падкрэсліў Пантыфік.
Каталіцкі Касцёл у Камеруне сваімі адукацыйнымі, медыцынскімі і дабрачыннымі справамі жадае і надалей служыць усім людзям без выключэння і сумленна супрацоўнічаць з уладамі дзеля чалавечай годнасці і прымірэння, — запэўніў Леў XIV, заклікаючы Божае благаслаўленне для краіны і ўсяго камерунскага народа.
Дзіцячы прытулак як прастора Божай Міласэрнасці
Апостальскае падарожжа Папы ў Камерун працягнулася кранальным візітам у дзіцячы прытулак «Нгул Замба» ў Яундэ. Ля галоўнага ўвахода Святога Айца сустрэла Генеральная настаяцельніца Кангрэгацыі Дачок Марыі, якая суправаджала яго ў галоўную залу структуры. Там Пантыфіка чакалі не толькі выхаванцы, але і шматлікія супрацоўнікі, для якіх гэты дзень стаў сапраўдным святам надзеі.
Звяртаючыся да дзяцей, Леў XIV падкрэсліў, што гэты дом стаў для іх месцам, дзе сам Нябесны Айцец прымае іх з любоўю.
«Вы ўтвараеце сапраўдную сям’ю, і ў гэтай сям’і ваш старэйшы брат — Езус»,
— адзначыў ён.
Папа дадаў, што ў свеце, азмрочаным абыякавасцю і эгаізмам, існаванне такіх месцаў нагадвае ўсім нам: у вялікай Божай сям’і ніхто не можа быць чужым або забытым, якім бы малым ён ні быў.
Леў XIV з глыбокім разуменнем паставіўся да цяжкіх выпрабаванняў, праз якія давялося прайсці многім выхаванцам. Ён узгадаў пра боль ад страты блізкіх, страх, адчужанасць і няпэўнасць. Аднак, паводле слоў Папы, кожнае дзіця з’яўляецца носьбітам абяцання, якое значна большае за любыя атрыманыя раны. Бог прысутны там, дзе ёсць пакуты, і Ён ведае твар кожнага, застаючыся блізкім у кожнае імгненне жыцця.
Асобныя словы ўдзячнасці Леў XIV адрасаваў тым, хто штодзённа суправаджае дзяцей: кіраўніцтву, педагогам, валанцёрам і законным сёстрам. Іх адданасць ён назваў прыгожым сведчаннем любові і тварам Божай Міласэрнасці.
Праз іх клопат дзеці атрымліваюць не толькі матэрыяльную падтрымку, але і будучыню, адчуваючы верную пяшчоту Бога, якая не знікае нават падчас суровых выпрабаванняў. Папа заклікаў супрацоўнікаў мужна працягваць гэтую высакародную справу.
Пасля абмену падарункамі, супольнай малітвы «Ойча наш» і заключнага спеву, Святы Айцец удзяліў прысутным сваё благаслаўленне, даручыўшы іх апецы Панны Марыі.
