Канклаў — старажытная працэдура выбару Пантыфіка, якая праводзіцца ў поўнай ізаляцыі ад знешняга свету і рэгулюецца дакладнымі правіламі — распачнецца ў другой палове дня 7 мая.
Як паведамляе Беларуская рэдакцыя Vatican News, дату пачатку працэдуры выбару Папы вызначылі кардыналы, якія 28 красавіка сабраліся ў Ватыкане на Пятай Генеральнай Кангрэгацыі.
Канклаў будзе праходзіць у Сікстынскай капэле, якая ўжо закрыта для наведвальнікаў. У бліжэйшы час яна будзе падрыхтавана да выбару новага Пантыфіка.
Таксама паведамляецца, што кардынал П’етра Паралін, які займаў пасаду Дзяржаўнага сакратара з 15 кастрычніка 2013 года да смерці Францішка, як найстарэйшы кардынал-біскуп будзе старшынстваваць на агульных кангрэгацыях, якія папярэднічаюць выбару Пантыфіка, а таксама на самім канклаве.
Са смерцю Папы Францішка аж да моманту выбару новага Папы ў Касцёле будзе трываць перыяд «Sede Vacante» (незанятага Святога Пасаду). Кардыналы-выбаршчыкі — чальцы Калегіі кардыналаў маладзейшыя за 80 гадоў — збіраюцца ў Рыме. Ключавым момантам з'яўляецца Імша «Pro eligendo Papa» (аб выбары Папы) і ўрачыстае зачыненне дзвярэй Сікстынскай капэлы.
Выбар адбываецца шляхам тайнага галасавання і ў поўнай ізаляцыі ад свету. Падчас шматлікіх паслядоўных галасаванняў кожны выбаршчык аддае свой голас за аднаго кандыдата, старанна складваючы бюлетэнь і ўкладваючы яго ў спецыяльную урну.
Для выбару Папы патрабуецца не менш як дзве трэція галасоў, аддадзеных за аднаго з кандыдатаў. Улічваючы, што сёння права ўдзелу ў канклаве маюць 135 кардыналаў-выбаршчыкаў (хоць невядома, ці ўсе возьмуць удзел у канклаве), для правамоцнага выбару Біскупа Рыма спатрэбіцца не менш як 90 галасоў.
