На трэцяй Кангрэгацыі кардыналаў, якая адбылася 24 красавіка 2025 года, былі ўдакладнены дэталі пахавання Папы Францішка ў базыліцы Санта-Марыя-Маджорэ.
Як паведаміў дырэктар Залы Друку Святога Пасада Матэа Бруні, з 11.00 23 красавіка да 13.00 24 красавіка 61 тысяча вернікаў аддала даніну павагі Папу Францішку ў Базыліцы Святога Пятра. Святыня будзе адкрыта для развітання да поўначы 24 красавіка, хаця гэты тэрмін можа быць падоўжаны ў залежнасці ад колькасці вернікаў.
«Цырымонія пахавання будзе прыватнай, але ўжо з раніцы нядзелі 27 красавіка 2025 года вернікі змогуць наведаць магілу Папы Францішка ў базыліцы Санта-Марыя-Маджорэ»,
— паінфармаваў прэс-сакратар.
Нагадаем, што пахавальная Імша распачнецца раніцай 26 красавіка ў 10.00 па рымскім часе (11.00 па мінскім часе). Пасля эўхарыстычнай цэлебрацыі адбудуцца абрад і малітва апошняга развітання (Ultima commendatio і Valedictio). Затым труну з целам Пантыфіка перанясуць у Базыліку Святога Пятра, а адтуль — у Базыліку Санта-Марыя-Маджорэ для пахавання.
