Ва Успамін усіх памерлых вернікаў, які адзначаецца ў Касцёле 2 лістапада, Папа Францішак узначаліць цэлебрацыю святой Імшы на Лаўрэцінскіх могілках, размешчаных на ўскраіне Вечнага горада.
Як паведаміла Беларуская рэдакцыя парталу Vatican News, праз шэсць гадоў ад свайго апошняга візіту на гэты трэці па памеры некропаль Рыма, плошча якога складае 21 гектар, Святы Айцец вырашыў зноў вярнуцца сюды ў Дзень задушны.
У 2018 годзе, перад тым, як узначаліць цэлебрацыю Эўхарыстыю, Папа спыняўся, каб памаліцца ў «Садзе анёлаў». Так называецца частка Лаўрэцінскіх могілак, дзе пахаваныя дзеці, у тым ліку і ненароджаныя.
Для ўшанавання памерлых у 2023 годзе Папа Францішак абраў іншае месца: рымскія вайсковыя могілкі ў квартале Тэстача, дзе маліўся за тых, хто аддаў жыццё ў войнах, запрашаючы ўсіх задумацца над каштоўнасцю чалавечага жыцця.
