7 лістапада вернікі парафіі святога Антонія з Мар’інай Горкі (Мінска-Магілёўская архідыяцэзія, Барысаўскі дэканат) узялі ўдзел у традыцыйнай восеньскай акцыі па добраўпарадкаванню тэрыторыі.
Сёлета падчас актавы малітваў за памерлых мар’інагорскія парафіяне на чале са сваім пробашчам, ксяндзом Генрыхам Кучынскім, працавалі на адных з найстарэйшых могілак Пухавіцкага раёна, размешчаных на так званай Сарафінавай гары, што непадалёк ад вёскі Суцін. Тут можна сустрэць надмагільныя камяні-помнікі з датай пахавання 1810 года.
Распачалі працу малітвай за памерлых, да якой асаблівым чынам заахвочвае вернікаў Касцёл у гэтыя дні.
У прыгожым восеньскім лесе, сярод магіл продкаў, працавалі пад кіраўніцтвам святара 8 мужчын і 3 жанчыны.
Гэта ўжо не першая такая акцыя, якая праводзіцца ў парафіі. У мясцовых парафіянаў ёсць надзея, што і ў будучыні традыцыя па добраўпарадкаванню могілак будзе працягвацца.
